Ана Бунтеска: Главата горе

Знае тешко да биде

Чиниш сиот свет на рамена ти стежнал

И како да не ќе додржиш

Ноќта да мине и да зазори

Знае

Знае тешко да биде

Некојпат без причина

Или нешто се собрало во душата

Та ќе излези тогаш кога не се надеваш

И како земјотрес ќе те измести

Како силно невреме ќе те погоди

Како бура

Како молња

Како небото непријател да ти е

Ете знае

Некогаш знае тешко да биде

И тогаш ти иди од кожата да си излезиш

И од сенката да си избегаш

Да не знаеш кој пат да го фатиш

И на каде да кинисаш

Та ти иди да врескаш

И се’ околу да здробиш

Денот прашина да го сториш

Како утеха, како бегство

Знае

Ех колку знае некогаш тешко да е

Без најава

Без причина

Ама па и тогаш чоек мудар треба да е

Или барем да се труди со ум да остани

Да го истурка и тој миг

Да успее и во сивото, боја да тури

Во студеното, топлина да сети

И да му мине

Да преживее

Со насмев и кога до смеа не му е

Со надеж и кога во црнилото загризува

И кураж да си даде оти ќе помине

И оти поарно ќе биде

Со главата горе

И без кревање бело знаме

Да знае

Да умее

Да истрае

Со верба

И со главата горе

Со главата угоре кон светлината

За Женски Магазин, Ана Бунтеска