Ана Бунтеска: Таа е силна

таа е силна

токму онолку колку што треба

за да не заплаче

кога во душата и’ е потоп

за да стои простум

кога коските однатре и’ се кршат

за да стави насмев

кога во устата стакло соџвакала

за да те гледа право во очи

кога пред неа се’ се руши

за да замавне гордо со косата

кога детето во неа цвили

за да кажува шеги

кога џигерот си го јаде (со одмерени залаци, како дама!)

за да ја карминисува устата

кога усните помодрени од касање и’ се

за да чекори небаре светот нејзин е

со нозе кои крварат во високите потпетици

за да со мирна рака пали цигара

кога срцето и’ трепери ко преплашен зајак

за да ти испее песна

кога гласот во неа умира

за да биде покрај тебе

кога сама себе се напуштила

за да се разбуди

кога веќе ниту денот смисол нема

за да дише

кога срцето повеќе не го чувствува

за да го исчисти домот

кога без тебе ниту дом има

таа е силна

токму онолку колку што треба за да биде

мајка

љубовница

сопруга

сестра

пријателка

љубов

поддршка

столб

бршлен

камен

свила

таа е силна

толку многу силна

доволно силна

токму онолку колку што треба

за да биде се’

за да биде

жена


За Женски магазин, Ана Бунтеска

Фото: Стојан Стојановски