„Чуваркуќа јајце“: Што треба да направите со најважното јајце во домот

Утре е Велики Петок, или „петок на страдањата“, а подразбира најстрог пост. На овој ден фарбаме велигденски јајца и ги подготвуваме за недела.

Постојат многу техники на фарбање јајца, но во секој дом неизбежно е боењето на барем едно јајце во црвана боја. Како што црвената боја е боја на Велигден, таа ја  симболизира невино пролеаната крв на Исус Христос. Обичај кај нас е првото јајце да се обои во црвена боја. Тоа се нарекува „чуваркуќа“ и се чува цела година и како што и самото име вели- ја чува куќата и домот.

За ова јајце се верува дека ги тера лошите сили и демони од куќата и домашните, односно дека ги чува од сите лошотии и несреќи.

Во некои краеви на Балканот, „чуваркуќата“ се чува и до наредната година, додека не се обои ново јајца. Кога ќе се обои нов чувар, стариот се фрла по река, да ги однесе сите несреќи кои паднале на него, наместо на куќата која ја сочувал.

Од друга страна некои кои имаат двор, го почитуваат обичајот да го закопаат минатогодишниот „чуваркуќа“ во земја под дрво кое сакаат да е плодно.

Кога ќе осамне велигденското утро, домашните прво се омрсуваат со јајца. Три дена, колку што трае и Велигден, сите си разменуваат јајца.