Како дете нижев тутун, не се срамам од своето минато: Искрено интервју со Ѓоко Јовиќ

Добивај вести на Viber

Најважната лекција ја научив од татко ми. Еден ден ме седна и ми кажа: „Сине, јас можеби не сум ти дал богатство, но сум направил сите да зборуваат за тебе само убаво. Сум оставил чисто лице“. Тие зборови ќе ги паметам цел живот

Познатиот пејач Ѓоко Јовиќ ја отвори душата за „Женски Магазин“ и искрено проговори за својот пат до успехот. Како што вели, животот не му бил секогаш благонаклонет, но се радува што сега е реализиран човек, среќен татко и сопруг.

* Долго време си на естрадата, имаш фанови кои редовно доаѓаат на твоите настапи, но дури сега почна повеќе медиумски да се експонираш. Тоа беше твоја одлука или едноставно не се поклопуваа коцките досега?

- Велат дека си онолку среќен колку што народот те поддржува и почитува, а морам да признаам дека мојата публика има огромно срце и будно ги следи моите настапи. Тоа се главно луѓе кои си ги сакам од душа, а таа љубов и почитта се заемни. Меѓу тие луѓе има и личности кои ми се особено драги и на кои сум им помогнал без да чекам нешто за возврат, бидејќи сметам дека Бог е подготвен да ти помогне и да те сака онолку колку што ти не можеш ни да замислиш. Затоа треба и ние да ги сакаме другите и да им помагаме. Бог постои во сите нас. Ние го вреднуваме и му даваме живот со тоа што ќе помогнеме некому, а тој ќе ни врати со поголема добрина. Бог е љубовта во нас. Сум помагал на луѓе кои немале ништо, сум помагал и на оние кои имаат многу. Не ги делам луѓето по тоа кој колку има. Едноставно ги почитувам оние што ме почитуваат, и секогаш сум тука за нив. Ако Бог е во моето срце, можам и јас да бидам во сечие. Таму каде што е Бог, таму сум и јас. Што се однесува до медиумското експонирање, секогаш сум се рекламирал онолку колку што ми барала и дозволувала мојата работа и моите нови ангажмани и песни. Морам да им се заблагодарам на сите медиумски и новинарски куќи кои со години неуморно стојат рамо до рамо со мене и секогаш се во чекор со моите проекти.

* Не си од оние деца на кои родителите им сервираат на тацна туку си морал самиот да се бориш со секојдневните предизвици. Која е животната приказна на Ѓоко Јовиќ?

- Како што знаете, потекнувам од Валандово. Во минатото моите родители се занимавале со земјоделие во кое преовладувал тутунот. И јас сум го работел тоа, знам колку е тешко и затоа ги ценам луѓето кои ја одржуваат во живот таа земјоделска култура. Не се срамам да зборувам за моето минато и секогаш сум подготвен повторно да го работам тоа. Најважната лекција ја научив од татко ми. Еден ден ме седна и ми кажа: „Сине, јас можеби не сум ти дал богатство, но сум направил сите да зборуваат за тебе само убаво. Сум оставил чисто лице“. Тие зборови ќе ги паметам цел живот.

* Колку сопругата има разбирање за твојата работа? Какви афинитети покажуваат твоите деца?

- Заради школувањето и подобра егзистенција заминав во Скопје, каде што преку навистина трнлив пат успеав да се пробијам и да се изградам како личност. Се оженив и Бог ми подари три прекрасни дечиња и сопруга со неверојатно разбирање, па тука и останав да живеам. Животот не ми беше секогаш благонаклонет, но сега сум успешен човек, среќен татко и сопруг и најсреќен човек на светот. Морам да бидам искрен и да откријам дека Теодора е тотален слухист, исто како и Михаил кој е еден од моите наследници и покажува огромен потенцијал. И Јоан е талентиран, но времето ќе покаже.

Ѓ.С.