Магија
Да немаш, а да имаш.
Да си на дно, а да се искачиш на врвот.
Да си несреќен, а да станеш среќен.
Да те мразат, а да те засакаат.
Да губиш, а да добиеш.
Да го гледаш секој, а никој тебе.
Да сонуваш, а сонот да стане реалност.
Секому му треба трошка магија во животот.
Некому на почетокот, а некому на крајот од годината.
Некогаш е само збор, некогаш желба, некогаш вистина, а некогаш фантазија.
Еден момент, еден ден, една година или цела деценија.
Магијата не ја прави само магионичар, на сцена или во филм.
Најчесто ние сме магионичари на нашата судбина, а некогаш судбината ни ја крои некој друг.
Ама, ете, сите со нетрпение ја чекаме новогодишната магија.
Тогаш градот мириса на печени костени, портокали и цимет.
На секој чекор украсени излози, украсени домови, се слуша детска смеа.
Почнуваат турканици, се полнат кафулиња и ресторани, секој е со задоволство виден гостин.
Семејството е центарот на вашиот универзум, наместо кафе, пиете топол чај со мед или греано вино со пријателите.
Никој не мисли на проблеми, сите мислат на новогодишните радости.
Во тоа е магијата. Да ве однесе со мислите и позитивната енергија некаде далеку, а всушност домот ви е Македонија.
Празници се ближат...
Лејла Сабит
