Ќе дадам сѐ од себе за мојата татковина: Васил Гарванлиев ќе патува на „Евросонг“ во Ротердам
Васил Гарванлиев ќе ја претставува Северна Македонија на евровизискиот избор во Ротердам, Холандија, одлучи менаџментот на национлниот сервис. Пејачот кој и лани отпатува на „Евросонг“ како придружен вокал на Тамара Тодевска, во неговото официјално обраќање до јавноста се заблагодарува на целиот тим на МРТВ кој го изласал и му ја дал довербата токму тој да ја има честа, но и одговорноста да ги брани боите на нашата земја на најголемото европско музичко натпреварување.
- Од кога паметам за себе, музиката e сѐ што правам, за што постојам, а многу често беше и е единствената светла точка во мојот живот. И покрај тоа што имам долгодишно искуство на меѓународни сцени свесен сум за предизвикот и одговорноста што претстојат за време на овој глобален настан, особено после успешниот пласман со Тамара минатата година. Сакам накратко да се oбратам на сите тие кои сонуваат и не се откажуваат од нивните амбиции. Патеката не секогаш е лесна, но еден ден секој чекор изоден напред со вложен труд и искрена љубов кон тоа што го правите ќе вроди со плод. Не се откажувајте никогаш! - пишува Гарванлиев.
Пејачот кој се прослави уште како дете со нумерата „Марионка“ вели дека е максимално подготвен за ова ново „патување“, како што вели со отворено срце и искрена приказна.
- Овојпат ветувам дека ќе дадам сѐ од себе за мојата татковина, за сите нас!!! Се гледаме во Ротердам - порачува тој.
Васил Гарванлиев, по потекло од Струмица, освен успешна интернационална музичка кариера, има тешка животна приказна. Кога имал 17 години, него и неговото семејство ги депортирале од САД. Живеел во Милано, па во Торонто, па повторно во САД. Во меѓувреме, за само една година, во сообраќајна несреќа загинале и татко му и баба му, во период кога секој член од семејството живеел на различна страна од светот. Најинтимните моменти од тешкиот период, Васил претходно ги сподели за „Женски магазин“.
Ѓ.С.
