Пикник сендвичи за велигденски излет: Гответе со Маја Лазаревска уникатни рецепти
Маја Лазаревска е водител на познатото македонско кулинарско шоу „Готвиме со Маја“ кое се емитува секој работен ден во 19:30 на ТВ 24.
Таа е мајка на близнаците Лео и Марио и е архитект по професија. Готвењето и е огромна пасија или како што вели медитација. Сака да експериментира во кујната, да испробува нови вкусови и рецепти.
Голем дел од рецептите кои ги презентира во емисијата ги готви низ годините. Купува готвачи, гледа тв-емисии, посетува курсеви, истражува и пробува техники.
-Со текот на времето добив чувство како рецептите да добијат уникатен вкус. Ја истражувам и науката, и на тој начин откривам како да ги употребувам состојките. Дали некоја состојка треба да е ладна или топла или да е на собна температура. Дали пецивото има две фази на растење – а тоа значи различно сечење, различна температура. Готвењето е наука, но и уметност. За мене готвењето е душевен мир, кој одамна го препознав. Со готвењето се полнам со енергија, убави мисли, ми се смирува телото и мозокот. Исто така, интересно е што моите деца, кои најверојатно ги имам презаситено со готвени јадења, слават секогаш кога ќе им кажам дека нешто ќе нарачаме - вели Маја.
Готвиме со Маја е емисија која ја сакаат и повозрасните и помладите. Освен на телевизија, нејзините рецепти можат да се следат и на социјалните мрежи фејсбук, инстаграм, и јутјуб, а таа веќе е омилен лик помеѓу сите гурмани и вљубеници во добриот залак.
Специјално за Женски Магазин направи предлог - мени за велигденски излет, Пикник сендвичи.
Потребни состојки
1 кг Свинска Плешка
4 мини багет лепчиња
6 лажици сенф
200 гр тенко исечена пршута
12 ливчиња чедар
6 кисели краставички
25 гр путер
Сол и бибер
Сос за месо и сендвич
Кора и сок од 2 портокали
Кора и сок од 1 лимон
Кора и сок од 2 лимети
1 лажичка оригано
6 чешниња лук
1 лажица мелен ким
7-8 лажици масло
Салата
200 гр тестенини машнички
1 авокадо
150 гр шери домати
200 г фета сирење
100 гр марула
1 краставица
4-5 лажици песто
1/2 чаша ориз
50гр бадеми
50 гр суво грозје
1/2 лимон
Маслиново масло
Прстофат сол
Безалкохолен коктел од јаболка
2 зелени јаболка
Сок од јаболка
1/2 китка нане свежо
1/2 кг кисела вода
3 лажици мед
Сок од 2 лимони
Коцки мраз
1 см рендан ѓумбир
Сендвичи:
Свинската плешка се премачкува со сол и масло и се става во загреана рерна на 220°C првите 10 минути и потоа на 160 °C уште 1 час и 50 минути.
На 20 минути пред крај месото се вади и се премачкува со направениот сос за месо и се враќа во рерна да се допече.
Потоа се вади од рерна, се остава малку да се олади и се цепка на тенки конци.
Багетите се сечат по должина, се премачкуваат со путер и се ставаат на скара или грил тава да се потпечат. Потоа се премачкуваат со сосот за месо, се става месото и останатите состојки, се поклопува и се витка во хартија за печење или во друга хартија за сендвичи. Може да се врзат и со коноп за печење за подобро да бидат спакувани.
Салата:
Се варат тестенини во форма на машнички, се вари и оризот и се мешаат со останатите состојки и се зачинува. Салатата се пакува во тегли, за полесно консумирање за време на излетот.
Безалкохолен коктел од јаболка
Јаболката се сечат на коцки и се мешаат со сите останати состојки. Коктелот се пакува во тегли.
Сé се пакува во корпа за излет и е подготвено за вистинско уживање во природа. Секако не ги заборавајте велигденските јајца кои се неизбежен дел за велигденските празници.
(С.А.Н)
