Се слави Светиот апостол Матеј: Празникот кога треба да се раздолжат сите неподмирени долгови, еве зошто
Како сведок на животот на Исус, земната смрт и воскресението, тој го напишал првото евангелие
Македонската православна црква и верниците денеска го празнуваат празникот Свети Матеј, празник посветен на Светиот апостол и евангелист Матеј. Матеј бил Евреин и богат даночник. Тој собирал приходи на патот што минувал од Капернаум од Галилеја до Сирија. Даночниците не биле популарни кај народот, кој не ги ценел и ги сметал за корумпирани и ритуално нечисти. Животот на Матеј се променил кога Исус Христос го повикал да го следи, а подоцна Христос го вклучил меѓу 12-те апостоли. Вооружен со божествена сила, тој го проповедаше христијанството и ги лекуваше болните, истеруваше ѓаволи, лечеше лепрозни и воскреснуваше мртви. Матеј бил очевидец и сведок на Исусовиот живот и земната смрт, воскресението и вознесувањето на небото. Апостолот, откако го примил Светиот Дух, најпрвин го проповедал Евангелието во Палестина, во Ерусалим и околината. Откако го напуштил Ерусалим, го проповедал христијанството во Македонија, Сирија, Етиопија...
Според преданието, светиот апостол Матеј го напишал првото Евангелие - Светото Евангелие според Матеј, а се нарекува и Евангелист Матеј. Денес е добро да се прочита Евангелието што го напишал, но и да се платат сите даноци и долгови. Матеј важи за светец-заштитник на цариниците, даночниците, банкарите и сметководителите. Се вели дека свети Матеј никогаш не јадел месо, туку се хранел со зеленчук, овошје и житарки
Матеј беше син на Алфеј, најпрво цариник (т.е. собирач на данок или митар) и како таков него го виде Господ во Капернаум и го повика: „Врви по Мене.“ И откако стана, тргна по Него (Матеј 9, 9). Потоа Матеј Му приреди дочек на Господ во својот дом и даде повод Господ да изрече неколку големи вистини за Своето доаѓање на земјата. Беше вброен помеѓу дванаесетте апостоли. Откако Го прими Светиот Дух, свети Матеј го проповедаше Евангелието во Партија, во Мидија и во Етиопија, земјата црнечка. Во Етиопија го постави за епископ Платон, свој следбеник, а самиот се повлече во молитвена самотија во гората каде што му се јави Господ. Ги крсти жената и синот на кнезот на таа земја, заради што кнезот се разгневи и испрати стража да го доведат Матеј пред него на суд. Војниците отидоа и се вратија кај кнезот говорејќи дека го слушнале гласот Матеев, но никако со очите не можеле да го видат светиот апостол. Тогаш кнезот испрати друга стража. Кога и оваа стража му се приближи на апостолот, него го огреа небесна светлина толку силна, што војниците не можеа да гледаат во него, но исполнети со страв го фрлија оружјето и се вратија. Тогаш кнезот сам појде. Кога му се приближи на свети Матеј, овој заблеска со таков блесок, што кнезот одеднаш ослепе. Но светиот апостол имаше милостиво срце, Му се помоли на Бога и кнезот прогледа - за жал прогледа само со телесните очи, не и со духовните. Тој го фати свети Матеј и го подложи на лути маки. Имено, на двапати ложеше голем оган на неговите гради. Но, силата Господова го сочува жив и неповреден. Тогаш, апостолот Му се помоли на Бога и Му го предаде својот дух. Кнезот нареди и телото на маченикот го положија во оловен ковчег, па го фрлија во морето. Светителот му се јави на епископот Платон и му кажа за своето тело и за сандакот каде се наоѓаат. Епископот отиде и го донесе ковчегот со телото на свети апостол Матеј. Кога го виде ова ново чудо, кнезот се крсти и го прими името Матеј. Потоа овој кнез ја остави сета светска суета и прими презвитерски чин, па богоугодно ѝ послужи на Црквата. Кога умре Платон, му се јави на овој Матеј самиот апостол Матеј и го посоветува да го прими епископството. Тој беше многу години добар пастир, додека Господ не го повика во Своето бесмртно Царство. Светиот апостол Матеј го напиша Евангелието на еврејски јазик, коешто набрзо беше преведено на грчки и до нас дојде на грчки, додека она на еврејски се изгуби. За овој евангелист се вели дека никогаш не јадел месо, а се хранел со овошје и зеленчук.Извор: денови.мк
Фото: денови.мк/freepik
