Телефонскиот разговор со мајката го намалува стресот еднакво како и прегратката
Мајчината прегратка е универзален лек за апсолутно сè. Нејзината топлина и блискост секогаш не тешат и што и да тргнало наопаку, многу полесно се поднесува. Но, кога веќе не живееме со мајка си и не можеме да ја гушкаме секој ден, има нешто друго што ќе не смири речиси на ист начин.
Има нешто необјасниво утешно во гласот на мајката. Можеби тоа е начинот на кој го кажува нашето име, можеби е ритамот на нејзините зборови или само чувството на блискост и сигурност. Но, науката го потврди она што отсекогаш интуитивно го знаевме – телефонскиот повик со мајка може да го намали стресот исто толку ефикасно како и нејзината прегратка.
Истражувањето на Универзитетот во Висконсин покажа дека само звукот на мајчиниот глас го стимулира лачењето на окситоцин, хормон поврзан со чувството на сигурност и среќа. Окситоцинот, кој често се нарекува „хормон на љубовта“, се ослободува кога некој физички ќе не прегрне, но сега истиот ефект можеме да го постигнеме и со телефонски повик.
Значително намалување на стресот
Во експериментот, учесниците, главно деца и тинејџери, биле изложени на стресна ситуација, а потоа поделени во три групи – на некои им било дозволено да ја прегрнат мајка си, други зборувале со неа на телефон, а трети слушале неутрален аудио материјал.
Резултатите беа многу интересни: нивото на стрес значително се намали во првите две групи, додека третата не покажа подобрување.
За многумина кои живеат далеку од семејството, оваа вест носи олеснување. Не мора секогаш да бидете физички присутни за да ја почувствувате топлината на семејниот дом. Понекогаш е доволно само да слушнеме познат глас на другиот крај на линијата – оној што не потсетува кои сме и каде припаѓаме.
Колку често ве зафаќа виорот на обврски, мислејќи дека немате време за „само еден“ телефонски повик? Следниот пат, наместо да чекате некоја посебна прилика, јавете се на мајка ви без причина. Може да почувствувате дека дишењето ви се забавува, рамената се релаксираат и насмевката полека се враќа на вашето лице.
Затоа што ако има нешто што може да ја замени мајчината прегратка, тоа е нејзиниот глас – топол, познат и секогаш полн со љубов.
