Го славиме Зачнувањето на свети Јован Крстител: Родителите денес треба да направат една работа

На овој ден се прославува милоста, чудото и мудроста Божја; милоста кон побожните и праведни родители на светиот Јован, старецот Захарија и старицата Елисавета, кои целиот живот посакуваа и просеа од Бога едно дете; чудото на зачнувањето на Јован во престарената утроба на Елисавета; и мудроста во домостројот на човековото спасение. 

Ова стана затоа што Бог имаше извонредни намери со свети Јован: имено, тој да биде Пророк и Предвесник на Господа Исуса Христа. Преку Своите ангели, Бог го објави раѓањето на Исаак од бездетната Сара и на Сампсон од бездетниот Маној и неговата жена, и на Јован Претеча од бездетните Захарија и Елисавета. 

Преку Своите Ангели Бог го објавуваше раѓањето на оние со коишто имаше посебни намери. Како можеа да се родат деца од стари родители? Ако е некој љубопитен да дознае, нека не ги прашува за тоа ниту луѓето, бидејќи луѓето тоа не го знаат, ниту природните закони, бидејќи тоа е над природните закони, туку нека го управи погледот кон силата на Семоќниот Бог Кој од ништо го создаде сиот свет и Кој за создавањето на првиот човек, Адам, немаше потреба од никакви родители, ни стари ни млади.

 Наместо љубопитност, да Му воздадеме пофалба на Бога, Кој често ни ја јавува Својата моќ и милост и мудрост и покрај природните закони, во кои оковани ние, без вонредните Божји чуда, би паднале во очајание и богозаборав.

Се верува дека на овој ден, сите родители кои не ги крстиле своите деца треба да го сторат тоа, или барем да одредат датум кога ќе го извршат крштевањето. И оние кои не родиле треба да се молат и да не губат надеж.

Јован Крстител беше погубен од јудејскиот крал Ирод. Евангелистот Лука сакаше да го пренесе телото на Јован од Себастија, каде што големиот пророк беше заклан во Антиохија.

Но, тој успеал само да ја добие и пренесе едната рака, која се чувала во Антиохија до X век, а потоа била пренесена во Цариград, од каде исчезнала за време на Турците.