Утринско кафе со Даниела Михајловска: Со задоволство го посветувам времето на квалитетни вечери со поширокото семејство или со пријатели
Како почеток на денот, утрото за мене започнува со тренинг, што ми обезбедува енергија и фокус во мојата работа каде прецизноста и посветеноста се основата за задоволни пациенти. По завршувањето на тренингот, уживам во првото утринско кафе, и тоа често на пат кон мојата ординација. Сакам да го пофалам мојот тим, кој честопати ме изненадува со омиленото кафе, за креирање на опуштена и пријатна атмосфера пред почетокот на работниот ден.
Мојата мотивација произлегува од професионалните успеси и постојаното развивање и унапредување во мојата област на стоматологија и естетика. Задоволството од бели, здрави и убави насмевки кај бројните задоволни пациенти константно ме поттикнуваат да работам со посветеност, енергија и да воведувам новитети кои ги очекуваат пациентите.
Моите дневни планови и обврски вклучуваат работа со моите пациенти по распореди и термини, консултации и совети со пациентите за нивниот најдобар избор за одржување на оралното здравје и естетика која е многу барана кај жените и девојки, како и постојано усовршување на техниките и методите за работа како во Македонија, но многу често и надвор од земјата. Се трудам да ги следам трендовите во естетиката и стоматологијата со специјалност во ортодонцијата за да одговорам на барањата и потребите на пациентите кои се добро информирани за новитетите.
Вечерите ги минувам со семејството, што за мене претставува важен момент за одмор и воспоставување на балансот. Со задоволство го посветувам времето на квалитетни вечери со поширокото семејство или со пријатели.
Домашна армосфера и добар филм се секогаш мојот наједноставен метод за релаксација. Но секако кога обрвските дозволуваат одењето во кино со девојчињата е нешто што ние го практикуваме. Во слободно време читам стручна литература и уживам во инспиративни книги и филмови.
*Спец. д-р Даниела Михајловска- стоматолог