Музејот посветен на Пабло Ескобар затворен за посетителите
Властите во колумбискиот град Меделин во соработка со миграциските служби, вчера го затворија музејот посветен на Пабло Ескобар, еден од најголемите нарко-босови во историјата. Музејот ја немал потребната лиценца за работа, а бил менаџиран од Роберто Ескобар, брат на поранешниот шеф на картелот „Меделин".
- Не би сакал луѓето да доаѓаат во нашиот град, па и во нашата земја, за да му се воодушевуваат на криминалот. Уште помалку да се заработува од сето тоа - изјави градоначалникот Федерико Гутјерес Сулуага.
Музејот се наоѓаше во една од куќите на Ескобар. Во него се изложени неговиот мебел, лични предмети и автомобили. Туристите наводно плаќале околу 30 долари за влез иако Роберто Ескобартврди дека влезот не се наплаќал, туку посетителите давале „доброволни прилози“.
Пабло Ескобар, за кого се смета дека е одговорен за убиства на околу 6.000 луѓе, беше застрелан во 1993 година.
