РЕЦЕПТ: Лосос филе

Добивај вести на Viber

Лососот се смета за една од најдобрите риби за човековото здравје. Освен што содржи добар процент на протеини, богат е и со витамин Д и Омега 3. Лососот никогаш не треба да се готви долго односно да биде „оvercooked“ затоа што ќе добиете безвкусно суво парче риба, пожелно е при спремање да не ја отстранувате кожата, а доколку го варите да биде со сок од лимон или пак во суво бело вино за да не ја изгубите неговата арома.

Идеи и варијанти за подготувавање

лосос има безброј. Иако е одличен спремен и само на маслиново, сепак јас имам друга идеја, затоа што сакам да експериментирам.

Потребни состојки:

900 гр. Лосос филе (може и парчиња)

Сол и бибер

За сос од магданос:

Шака магданос

100 гр. Пињоли

1 чешне лук

1 лимон

20мл. Маслиново

Сол и бибер

За Холандезе сос:

1 жолчка

1лажица сок од лимон

1 м.лажичка сенф

50 гр. Путер

Сол

Вклучете ја рерната на 200 степени да се загрее парчето лосос ставете го на хартија за печење наросете сол и бибер и ставете да се пече 10мин.

Додека се пече лососот во блендер ставете ги сите состојки за сосот од магданос и блендирајте 1 мин. Доколку сакате да биде во вид на паста тогаш блендирајте подолго.

Потоа растопете го путерот а жолчката ставете ја заедно со лимонот и сенфот на пареа и гответе додека да се соединат и додека да почне да се згуснува потоа тргнете од оган и постепено додавајте го путерот со постојано мешање. Доколку ви се раздвои сосот, ставете коцка мраз и убаво мешајте. Посолете по желба.

По 10 мин. печење извадете го лососот и премачкајте го цел со сосот од магданос. Вратете уште 3 до 4 мин. Откако ќе се испече, сервирајте. Јас го сервирав на компир насечкан на крукчиња, потпечен со пармезан. А од страната на холандезе сос ставив краставичка во ролни.

Bon appetite…

За Женски магазин готви Маја Зивчевиќ