Златна Буба Мара на популарноста го исполни аманетот: Инклузивност, почит кон традицијата и верување во сопствените сили (ГАЛЕРИЈА)
28 издание на Златна Буба Мара на популарноста. Годинава под мотото „Вештачка интелегенција за Владата, природна забава за народот“. Познат декор, преполна Сала „Борис Трајковски“, гламурозна сцена, одлично озвучување, симфониски оркестар составен од најдобрите музичари... Рецепт за одлична забава. Спектакл којшто се раскажува 365 дена. Жирант за добра забава. Но, да одиме по ред... И простете ако заборавам некого или нешто, зашто спектаклот траеше точно 4 часа и 20 минути.
Како и претходните години, и оваа година Златна Буба Мара на популарноста покажа должно внимание и почит кон музиката, театарот, сликарството и литературата, иако годинава ги заборави филмот и телевизијата. Или тие не беа доволно интересни во изминатите 365 денови? Не би рекле. Додели само една награда од областа на спортот, за спортски трајни вредности на легендарниот центархалф Илија Најдовски, а ги подзаборави ракометарите и ракометарките.
Иако, рака на срце, големото шоу започна со атрактивен бајкерски настап на самата сцена, но и на видео бимот. Само кој го виде, ако се има предвид дека публиката сѐ до 20 часот и 30 минути полека ја полнеше слата Борис Трајковски, иако беше потенцирано дека настанот ќе започне точно во 20 часот. Пусти стари навики, кој ли ќе ги искорени? А може па и не е сѐ до народот? Околу ниту една сала во светот не е забрането паркирање, освен кај нас. Па кутрите возачи редовно мораат половина час да се снаоѓаат низ тесните улички во Карпош, а само двете отворени врати во Салата и огромниот ред за влез – се посебна приказна. А за што е паркингот пред салата, за украс?
Дел од најавите и годинава беа снимени со гласот на легендарниот Благоја Крстевски, кој е еден од најредовните гости на Буба Мара сите овие 28 години. И почна шоуто, кое крајно оптимистички беше замислено да трае до 23 часот и 30 минути...
Прво директно од сателитот на Илон Маск долетаа Мијата и Денис Космонаутко, кои заедно со Златните славејчиња, ја испееа новата инклузивна химна „Ние сме гуш и бац“. Следуваше новата музичка надеж Ана Петан, која заедно со легендарната Зорица Поп Панкова, го испеа големиот хит од 70-те години на минатиот век „Диско пар“, а потоа заедно со Сашо Гигов – Гиш феноменално го интерпретираа блуз евергринот „Моја гитара“. Потоа Гиш моќно ја изведе композицијата „Еј, ти младо момче“, дело на неодамна починатиот композитор Љупчо Константинов, а премиерно изведена од групата Индекси на Скопскиот фестивал во раните 70-ти.
И годинава Ранко имаше впечатливо добредојде за сите гости, по што, како што рече тој „шанса да се поправи“ доби новиот интересен хуморист и имитатор од Куманово, Жарко Јовановиќ, кој повторно ја зовре атмосферата со својот свеж хумор и одлични имитации на нашите политичари. Го добива ли Македонија својот Мистер Бин? Не е ли време за негов ТВ проект?
Следуваше настапот на Дарио со микс од неговите најголеми хитови, по што тој ја доби награда за трајни вредности и изјави дека се надева дека уште долго ќе трае и ќе создава хитови на македонската естрада. Неговиот одличен настап беше проследен од неговиот бенд Миг 21 и од танчерската група од Денсерс Јунајтед.
Сите музички точки во текот на вечерта беа отсвирени како што доликува во живо, од голем симфониски оркестар, но и од неколку бендови и врвни инструменталисти (Стевче Стојковски, Александар Јовевски) кои создадоа одличен звук во преполната сала.
Фолк легендата Перо Христов ја доби наградата за животно дело и ја почести публиката со моќна изведба на антологиската „Нема живот, Ангелино“, по што вети дека ќе пее до последен здив.
А потоа следуваше т.н. патриотски блок, кој Ранко и неговиот тим посебно и со многу љубов и внимание го подготвуваат изминативе неколку години. И редовно предизвикува восхит, возбуда, гордост и солзи. Така беше и годинава. Најпрво „македонскиот“ Јапонец Казухиро Котецу, кој специјално допатува од Јапонија за да настапи на Буба Мара, а Ранко не жалеше пари да го доведе, ја исполни антологиската „Ако умрам ил загинам“ од Јонче Христовски. Интернет сензацијата предизвика вистински делириум во публиката, која стана на нозе и го поздрави Јапонецот, кој успеа моќно и сугестивно да ја донесе песната на Јонче, но и комплетно да го преслика неговиот сценски настап, со фрлањето на платото во публиката. Незаборавно чувство.
Следуваше кулминацијата со настапот на Сузана Спасовска, која вонсериски во свој стил ја исполни „Биљбиљ пее во градина“, а подоцна и „Судбо моја“. Одлична паралела беше постигната преку емитувањето на снимка од концерт на легендарната Васка Илиева, на кој таа ја преставува својата наследничка, тогаш младата и надежна, Сузана Спасовска. Јасно е дека Ранко постојано и со години инсистира на почитување на нашата традиција, чии главни перјаници имаат задача да ги промовираат новите и вистински нивни музички наследници во сите жанрови. На тој начин спонтано и ненаметливо скоро три децении се лансираат нови ѕвезди на нашето естрадно небо. Впрочем, пред 26 години токму Сашо Гигов – Гиш на Златната Буба Мара во Универзална сала му ја додели на Тоше Проески првата Златна Буба Мара за најперспективен пејач. И токму од тој миг почна ѕвездената кариера на нашиот вечен идол.
Потоа го видовме одличниот настап на Ансамблот на Стевче Стојковски, кој доби Златна Буба Мара за 25 годишното негување на македонската народна музика и кој ја изведе хумористичната тема „Зајко кокорајко“, дело на Александар Сариевски. Јаготка на шлагот беше настапот на Игор Џамбазов, кој на волшебен начин го рецитираше „Тешкото“ од Блаже Конески во придружба на Универзитетскиот Ансамбл Македонија.
Буба Мари освоија и сликарот Мирослав Масин и писателот Тихомир Јанчовски.
Хуморот и оваа година беше на високо ниво, а за тоа придонесоа ланското откритие Жарко Јовановиќ, Тино Костадиновски (без Атанас, а никој не кажа зошто?) и Сашко Коцев. Но, впечаток е дека речиси сите скечови предизвикаа некаков горчлив вкус и јасно е дека сатирата е веќе толку секојдневно присутна во нашиот живот, што сѐ потешко може да нѐ насмее. Но, во секој случај може да нѐ замисли, што е и вистинската цел на секоја добра политичка боцка. А Буба Мара и оваа година не ја штедеше ниту новата власт, ниту старата, а особено посвети внимание на „бисерите“ на последните наши премиери, иако се обиде да го имитира и актуелниот наш Премиер, и актуелната Претседателка. Предупреди и за опасностите од евентуална промена на грбот на Република Македонија, доведувајќи ја до апсурд можноста да се додаваат во актуелниот грб разни животни, по што ќе почне да наликува на зоолошка граница. Скраја да е! А посвети внимание и на новиот претседател на САД и неговото кратење пари наменети за финансирање проекти во странски земји. И сето тоа предизвика смеа, чести и громогласни аплаузи, но и некој видлив грч во секоја насмевка. Се изморивме ли веќе од предолгата транзиција? Или веќе ни се тажно-смешни секојдневните глупости што ни се случуваат?
Годинава по седми пат театарската главна награда за претстава на годината отиде во рацете на Синиша Евтимов за веќе култната претстава „12“ на новиот моќен МНТ со дрим тимот од 12 најдбро македонски актери. За актерка на годината беше прогласена Дарија Ризова, а за актер на годината – Ѓорѓи Јолевски. Театарот за деца и младинци и неговата „Роња, ќерката на ограбувачот“ конечно беа наградени и кај нас, по многуте освоени награди на странски фестивали, за најпопуларна детска претстава.
Калиопи освои три златни Буба Мари: за концерт на годината, пејачка на годината и албум на годината. Последната награда му ја посвети на својот композитор Ромео Грил, по што направи мини концерт со своите најголеми хитови и во придружна на својот бенд. Кулминацијата настапи кога таа, но и целата сала пееја за нејзиниот Бато во еден глас.
Златна Буба Мара освоија и Слаткар и Некст Тајм, за дуетската „Океани“ која го понесе епитетот хит на годината.
А емотивен настап во живо имаше и групата Меморија која прво ја исполни нумерата „За тебе“, посветена на сопругата на Поце. Меморија, иако ослабена со отсуството на Ристо Самарџиев, кој не настапи од здравствени причини, но засилена со младиот Филип Николовски, заедно со Поце и со целата сала, го испеаа новиот голем хит на Меморија „Само за добро да е“. Емоција, инклузивност, музичка страст... Прекрасно. Групата освои две награди - Рок група и Рок концерт за 2024.
Ова беше прво издание на Златна Буба Мара на популарноста целосно реализирано со музички гости од Македонија и без присуство на ниту една голема музичка ѕвезда од регионот, што беше пракса во сите изминатите 27 години. И повторно беше интересно, забавно и траеше 4 часа и 20 минути. Значи можеме и сами, без помош од надвор, односно без странски фактор како што би рекол неповторливиот Сашко Коцев. Ранко и специјалниот тим на Радио Буба Мара неколку години го подготвуваа ова сценарио и конечно успеаа да покажат и да докажат дека и ние имаме одлични интерпретатори, музичари, хитови, комичари, актери и луѓе кои оставиле траен печат во историјата на Македонија и не ни треба ничија помош. Тоа во никој случај не значи затвореност кон туѓиот квалитет, туку почитување на сопствената култура и традиција, нешта кои тимот на Ранко Буба Мара одамна ги има сфатено.
Сашко Коцев, иако многу настинат, со инфлуенца Б и со постојано кашлање вон радиус на микрофонот, успеа по којзнае кој пат да ја насмее до солзи публиката во салата „Борис Трајковски“. А таа повторно падна на испитот и некаде околу полноќ почна да ја напушта салата, по што специјалниот гостин на вечерта, нашиот Муарем Сербезовски мораше пред полуполна (или полупразна сала) да го испее својот голем хит „Зашто су ти косе побелеле друже“ и да раскаже за сите свои литературни и преведувачки успеси во Србија и во регионот. И да фрли голем предизвик пред МАНУ: дали ќе има доблест да го избере за академик, како што направиле нивните колеги во Србија и со тоа да стане првиот Ром со таа титула во нашата земја? Муарем е скопјанец и првите чекори ги има направено во Топана пред многу децении, пред да го освои целиот регион и пред да стане човекот кој напишал шест романи и кој ги превел на ромски јазик Библијата и Куранот. Секоја чест. Србија и Хрватска веќе тоа го препознале, а ние? Засега само Буба Мара му додели Награда за животно дело. Другите се на потег...
Соња Алексоска Неделковска
ФОТО: Вангел Тануровски
