Денес се слави еден од најголемите Господови празници: Слегувањето на Светиот Дух - Педесетница
Новозаветната Педесетница е денот на славното исполнување на ветувањето за Христовото испраќање на светиот дух врз апостолите. Ова е крајно радосен, извонреден и утешителен настан. Педестница е еден од најголемите Господови празници. Меѓу народот е познат со повеќе имиња, како Дуовден, Доедни, Свети Дух, Педестница итн. Се празнува десет дена по Спасовден -Вознесение Христово, а педесет дена по Велигден - Воскресение Христово.
Духовден го означува слегувањето на Светиот Дух врз апостолите, или како што го нарекуваат светите отци „Роденденот на Црквата".
На 10-тиот ден од Христовото вознесение, а на 50-тиот од Неговото воскресение, Светиот Дух слезе врз апостолите во вид на пламени јазици, а тие се исполнија со сила и добија дар да зборуваат на разни јазици.
За црквата овој настан има посебно значење затоа што Светиот Дух од тоа време, па се до денес не ја напушта и непрестано слегува врз црквата на литургијата, во молитвите, во сите дела. Тој е оној Дух по кој христијанскиот живот се нарекува духовен.
Педесетница е еден од најсветлитe празници во христијанството и претставува исполнување на старозаветните пророштва. Во Стариот завет луѓето знаеа само за Бог, со раѓањето на Христос го видоа Единородниот Син, а на Педесетницата го запознаа третото лице на Света Троица – Светиот Дух.
Фото:bigorski.mk