Европа се „отвора“ за странските туристи, но под одредени услови

Европа се отвора за странски посетители по повеќе од една година ограничувања, но мерките варираат од земја до земја. Европската унија им препорача на земјите-членки да ги укинат ограничувањата за туристите од САД, заедно со неколку други земји, вклучувајќи ги Северна Македонија, Албанија, Србија, Либан и Тајван (АНСА).

Вакцинираните лица смеат да влезат во Франција, но само со вакцини одобрени од ЕУ - Фајзер, АстраЗенека, Модерна или Џинсон и Џонсон.

Границите на Франција официјално се повторно отворени. Вакцинирани посетители од земји надвор од ЕУ и неколку „зелени“ земји сепак ќе треба да направат ПЦР-тест не постар од 72 часа или антиген тест не постар од 48 часа.

Забраната за влез се однесува на туристи од 16 земји на црвената листа, на која се наоѓаат Индија, Јужна Африка и Бразил. Невакцинираните лица од земјите на „портокаловата листа“ - вклучувајќи ги Соединетите држави и Велика Британија - не можат да доаѓаат од туристички причини.