РЕЦЕПТ: Мафини со лимон и јагоди
Јагода и лимон сте пробале? Ммм мене ми се одличен спој. Овој пат решив да пробам да направам мафини со оваа комбинација но со најминимална можна количина на какво било брашно. И успеав. Крцкава кора и сочна внатрешност. Ќе зажалите ако не ги пробате … Следете ме и сигурно ќе успеете во тоа.
Потребни состојки за 12 мафини
2 јајца (М)
50гр. Кафен или кокосов шеќер
1 Лимон
50гр. Путер
150гр. Јагоди
100гр. Спелтино брашно (може и обично)
1 кап (cup) Овес -цели зрна не мелен
1 лажичка сол (2гр.)
10гр. Прашок за печива
2-3 капки Ванила
• Потрудете се да мерите точно и прецизно. Доколку печете во силиконски калапи нема потреба од хартиени корпи за мафини.
Рерната вклучете ја на 205 степени. Во тава за мафини ставете хартиени корпи и измерете ги состојките. Најпрво во сад помешајте ги брашното,солта и печивото. Во друг сад изматете ги со рачна маталка јајцата и шеќерот некаде околу една минутка да почне да пени.
Потоа изрендајте ја кората од лимонот и исцедете го истиот лимон во смесата. (Внимавајте на семките. Промешајте да се соединат па додадете ги јагодите ситно исечкани (свежи или смрзнати изборот е ваш). Повторно промешајте а потоа додадете ги сувите состојки и овесот соединете ја целосно смесата и додадете го путерот претходно растопен.
Со лажица за сладолед распоредете ја смесата во 12 мафини. Одозгора наросете малку овес и кафен шеќер и на печење. Печете 5 мин на 205 степени а потоа рерната намалете ја на 180.
Тајната за убави воздушести мафини всушност лежи во овој трик со температурата на рерната. Една шолја од вашето омилено кафе е совршена комбинација со овие појадок/ужина мафини.
За Женски магазин, готви Маја Зивчевиќ
