Се одржа „Напред розово“ - прошетка за подигање на свеста во борбата против ракот на дојка
По десетти пат денеска во главниот град се случи прошетка за подигање на свеста во борбата против ракот на дојка во Македонија.
Дел од традиционалната прошетка „Напред розово“ беа пациенти со рак на дојка, излечени од оваа болест и граѓани поддржувачи
Mинистерот за здравство Венко Филипче, пред почетокот на манифестацијата во Градскиот парк во Скопје, порача дека раната детекција и скринингот може да доведат до целосно излекување на ова сериозно малигно заболување од кое страдаат многу жени.
Во однос на забелешките на пациентите за „Мој термин“, министерот Филипле, рече дека имале работни состаноци и дале забелешки, што веќе се имплементирани во конкретни мерки со кои е зголемен бројот на термини во клиниките и во Клиниката за радиологија, со што времето на чекање значајни ќе се намали, додека пациентите со малигни заболувања ќе имаат посебна форма на приоритет во закажување на снимањата.
- Неколку дена во прекин беше работата на компјутерската томографија, заради инсталација на нов апарат, кој што е значително подобар и со поголем капацитет од стариот. Притоа и стариот ќе го поставиме на ново место, со што на ќе се дуплира капацитетот, рече Филипле.
Министерката за труд и социјална политика Мила Цароска, посочи дека е важно сите жени да застанат навремено во превенција на оваа болест и да си дадеме поддршка едни на други.
- Сите жени коишто во моментов не направиле преглед денеска треба да се потсетат дека треба да го направат и да превенираме она што понатаму би требало да се лекува. Само со подигање на јавната свест можеме да спречиме многу жртви од оваа болест, рече Цароска.
Aмериканскиот амбасадор Џес Бејли, рече дека со денешната прошетка луѓето од Скопје се придружуваат на стотици илјадници луѓе од целиот свет во прошетката против ракот на дојка, за подигање на свеста и потребните средства за превенција, истражување и поддршка на жените
- Сите ние сме погодени од ракот на дојката и сите ние можеме да помогнеме во подигање на свеста и превенцијата, порача Бејли.
„Напред розево“ е уникатен настан кој ги обединува сите кои ја преживеале болеста, нивните пријатели, како и сите граѓани на Македонија. Со „Напред розево“ веќе десет години здружението „Борка“ и Македонија се дел од големото светско семејство на борци против ракот на дојка. На настанот им беа врачени „медал на честа“ на 10-те жени и мажи, кои се избориле со рак на дојка за нивната посветеност во кампањата „Напред розово“. Претходно групата „Трка за надеж“ учествуваше на Скопскиот маратон во трчање.
