Стил профил со Јана Бурческа: Се случувало да бидам осудувана за комбинации во кои сум била целосно своја
Фото: Сашо Доковски
Приоритет ѝ е да се чувствува природно и комотно, воопшто не сака да експериментира кога е во прашање косата, а идеалната модна комбинација за неа е спој кој денски може да се носи со мартинчи, а навечер со високи потпетици
Познатата пејачката и водителка Јана Бурческа специјално за „Женски магазин“ открива дел од својот гардеробер.
Кои се нејзините омилени парчиња облека и што за неа значи стилот, откријте во продолжение.
* Дефиниција за стил.
- Естетски приказ на прифаќањето на својата автентичност.
* А, Вие стилски се дефинирате како...
- Своја во своето време.
* Што е пресудно за добар стил?
- Стилот е субјективна категорија, но сепак сметам дека доаѓа до израз кога модните парчиња се усогласени со духот и темпераментот на оној кој ги носи.
* Комбинирате елегантно со спортско или сте камелеон во облекувањето?
- Во секојдневието многу се радувам кога ќе успеам да спојам елегантно со спортско и тоа изгледа убаво, а кога станува збор за настани се трудам да сум камелеон односно во свој стил да се адаптирам на пригодата.
* Минимализам, хедонизам, авангарда?
- Минимализам со авангарда.
* Гламур или класика?
- К л а с и к а.
* Омилени нешта од Вашата облека?
- Црни ролки, бели џемпери и еднобојни кроп-топс.
* Дали практикувате брендирана облека или не Ви е пресудна етикетата?
- Брендовите не ми се важни, сè додека гледам дел од себе во парчето облека. На оваа тема би додала дека секогаш избирам да поддржам македонски бренд/дизајнер наспроти „светските, познати брендови“. Така, во мојот гардеробер покрај „нормалните парчиња“, имам облека од Митко Занов, Ателје Персемпре, Антонија Ристовска, Terziya, Ирина Тошева, Стефанија Насеска, Pinc…
* Што сакате да постигнете со Вашиот стил?
- Најискрено, приоритет ми е да се чуствувам комотно и природно. Се трудам да оставам впечаток со по некој детал, иако сликата е најчесто едноставна, еднобојна и чиста.
* Дали ако сте автентична, тоа значи и осудување од нашава средина?
- Доколку сме вистински автентични, не би се грижеле за тоа што ќе кажат другите – ова го кажувам само теоретски, бидејќи иако целам кон истото, сепак не сум целосно таму. Да, се случувало да бидам осудувана за комбинации во кои сум била целосно своја.
* На кој дизајнер би му дозволиле да Ви го преуреди гардероберот?
- Во овој контекст повторно би издвоила македонски дизајнер, прво, затоа што е пореално сценарио, а второ затоа што силно верувам во неговиот потенцијал и работа – Митко Занов. Ќе се согласите дека неодамна сите не остави без зборови со последната колекција „Nocturnal“.
* Што облекувате денски, а што навечер?
- За мене идеалната комбинација преку ден изгледа супер во мартинки, а се трансформира во вечерна комбинација со промена на обувките – во штикли.
Фото: Сашо Доковски
* Дали експериментирате со косата и шминката?
- Кога станува збор за косата – прездодевна сум. За прв пат на 27 години ја скратив должината, на 28 години за прв (и последен) пат направив прамени, а годинава на 29 прв пат направив „curtain bangs“, доволно куси да се гледа дека се шишки и доволно долги да не се познаваат. Дефинитивно повеќе експериментирам со шминката, но не сама, туку во соработка со професионалнци како што е мојата омилена Ивана Деловска.
* Ваши трикови за брз, но ефектен изглед?
- Дотерајте се како сакате, по свои правила, слушнете ја омилената песна и освојте го светот со насмевка.*Д.Караташова Илиоска
