„Ако не бев предизвикана на толку многу начини низ годините, немаше да ги барам решенијата што ми помогнаа да се променам“: Јелена Спенџарска слави роденден
Водителката Јелена Спенџарска денес слави роденден. како и секогаш, на луциден начин напиша подолг текст на Инстаграм во кој опишува многу детали од нејзиниот живот, но и многу мудрости:
Трета година по ред, денот на моето раѓање го започнуваме на оваа тераса !
Ако пред неколку години не одлучев дека ми е доста од животот во лавиринт и едни те исти ситуации со различни луѓе, немаше да го запознаам мојот партнер, да го имам овој дом, ниту пак животот во друга држава кој сум го посакувала од дете.
Тоа беше за време на таа една толку празна пролет кога само сакав да побегнам од се и решив да заминам од дома на подолг период. Без тој момент, немаше да има Халкидики – патување што засекогаш ми го промени животот, покажувајќи ми точно како сакам да живеам и како апсолутно не сакам.
Ако не бев предизвикана на толку многу начини низ годините, немаше да ги барам решенијата што ми помогнаа да се променам. И ако не ги барав тие решенија, немаше да го имам овој живот сега, ниту пак сите неверојатни работи кои ми се случија на патот кон остварување на своите соништа!
Ова го споделувам со тебе затоа што чувствувам дека треба повеќе да го промениме начинот на кој гледаме на минатото и на себеси. Наместо постојано да се фокусираме на лекување на старите рани и да се прашуваме:
-Зошто баш на мене ова ми се случува?,
-Со што го заслужив ова? … и слично
гледај ги како причина што токму ти си ТАА сега во овој момент! Секој предизвик те обликувал, те изградил во личноста што си денес. И тоа само искористи го за подобро утре!
Често, во моментот, не ја гледаме поголемата слика ниту ја разбираме причината зошто нешто се случува. Но подоцна, кога ќе се свртиме назад, сликата станува јасна.
Разбираш дека тие моменти биле токму тие што ја откриле твојата цел и твојата сила!
Слушај си го гласот во себе! Интуицијата! Ако си на место кое не ти се допаѓа тука си зашто си гледала да угодиш на сите освен на себе. Слушај си го гласот !
Прегрни ја магијата на тоа што си, и патувањето што те доведе до тука.
Денес, јас си се славам за тоа што СУМ !
Ми се допаѓа каде сум и со кого.
За убава сегашност и уште поубава иднина,
среќен роденден, Јелена
Инстаграм
