Почнала со фудбал и кикбокс, а денес тренира борење и ММА: Леа Стојковска за предизвиците на младите ММА жени борачки
Не постојат машки и женски спортови, едноставно ако си доволно подготвен и имаш супер талент без разлика од кој пол си успехот е загарантиран.
Леа Стојковска (18) од Скопје е млада спортистка која тренира борење и ММА (мешани боречки вештини). Иако нејзините почетоци со спортувањето се во фудбалот и кикбоксот. Боречките вештини се нејзин избор и сигурен терен каде може подобро да се изрази.
„Тренерот по кик бокс не носеше на тренинзи борење, за да стекнеме знаење за ММА, но јас не сакав да одам бидејќи не ми се допаѓаше борењето, некако ми немаше смисла. Но како поминуваше времето со редовното тренирање, дојде време кога требаше да почнам да се натпреварувам, а со тоа да носам победи. И така ми се допадна овој спорт и сè уште го тренирам“.
Фудбалот почнала да го тренира на 10 години, па се до нејзина 18-та година, кога ја играла последна сезона, бидејќи почнала да се подготвува за ММА.
„ММА гледам од малечка. Додека сите мои врснички играа со барбики и гледаа цртани, јас гледав ММА борби. Тоа го сакам од малечка, само кај нас овој спорт многу доцна почна да се развива, затоа и толку доцна започнав да тренирам. Доколку беше овој спорт присутен порано ќе можев да почнам со тренинзи од 8 години, и само тоа ќе беше мојот избор“.
Во моментов тренира во тимот на „Вардар“. Вели дека интерес кај девојките за борење има и се доста застапени, но затоа пак во ММА не се толку бројни.
Најголемиот предизвик во ММА за Леа е учењето на комплексните елементи, па и затоа адреналинот во овој спорт е поголем.
Досега со борењето има учествувано на неколку првенства, а од таму се има вратено со освоени медали, додека со ММА борбите ќе започне од септември.
„Се имам натпреварувано на државно првенство во борење во У23, каде што го освоив првото место. Во сениорска конкуренција освоив второ место. Лани освоив прво место во У20, исто така освоив европско првенство во сениорска конкуренција“.
Иако млада, Леа досега се има соочено со повреда на рамо и колено, но овој здравствен проблем брзо го надминала и повторно се вратила на теренот.
ММА борењето како и секој спорт бара добра физичка подготвеност.
„Одржување на физичкиот изглед (килограмите), техника, издржливост, флексибилност, кондиција, искуство, пожртвуваност, напорни тренинзи, одмор на телото, одржување на мускулатурата (масажа)“.
Бидејќи е девојка, а секоја девојка сака да изгледа средно и женствено. Прашавме дали во овој спорт се дозволени долги нокти.
„Кога сум во подготвителен период каде што нема излегувања и има строги рестрикции, само за тренинг и одмор на телото, не се дозволени. Но кога имаме пауза, одмор од борби, подготовки секако дека може, сепак ние сме девојки така се однесуваме надвор од работата“.
За секој спортист важна е мотивацијата, а оваа млада девојка има и мотивација и голема поддршка.
„Ме мотивира мојата фамилија и моето момче Марко, кој има многу голема улога во тоа како напредував за толку брзо време во борењето. Тој ме научи да чекорам во тој спорт и ми помогна многу и ден денес седи во ќош како тренер и најмногу ме мотивира“.
Леа има искуство кога стекнатите боречки техники, била принудена да ги искористи и во самоодбрана.
„Додека учев во Тетово, пола година фудбалска академија, ми се случи неколку дена да ме следи некој од школото до дома. Третиот ден ме нападна, морав да реагирам и да се одбранам, никој од луѓето што поминуваа не сакаа да ми помогнат, само гледаа и се смееја, што во општо не е убаво без разлика за кого се работи. Затоа на сите девојки би им препорачала да одат на некаква боречка вештина, не мора да се занимаваат, туку едноставно да знаат како да се справат, доколку се најдат во ваква ситуација“.
Габриела Додевска Глигоровска
