ВИКЕНД ИНТЕРМЕЦО: Како настанале македонските хитови?

Секој рефрен има своја приказна. Уметниците гордо раскажуваат за своите дела, особено ако успеале да создадат песна која го надживеала времето во кое е создадена. Особено интересни се приказните кога хитовите првично им биле понудени на други изведувачи, но од различни причини не ги прифатиле. Рубриката „Викенд интермецо“ е серијал преку кој уживате во македонските хитови, но и дознавате како истите настанале. Изборот го прави Ѓорге Стојанов

„Неправда“ (Лева патика)

Гранит Таки, пејачот и водачот на „Лева патика“ во едно интервју откри дека антологиската тема на почетокот не сакале да ја емитуваат на Радио Скопје, наводно поради тенденциозниот текст. Тој и останатите членови на бендот биле обвинувани дека шират антикомунистички пораки со стиховите „имаш ти, немам јас“. Реагирал и композиторот Љубомир Бранѓолица кој по две недели успеал да ги убеди луѓето во националниот сервис да ја вратат песната во етерот.

- Текстот е инспириран од луѓе и настани што ми беа блиски во тоа време. Еден мој другар сонуваше за „БМВ Алпина“, друг беше заљубен во Кети Лешкова, тоа беше нашата тогашна градска шема–откри Гранит Таки.