Кејт Бланшет ќе го предводи меѓународното жири на овогодинешното издание на филмскиот фестивал во Кан, соопштија организаторите.
Со тоа талентираната австралијка и добитничка на два Оскари ќе стане 12-тата жена, која застанала на чело на престижниот панел во Кан во историјата на фестивалот.
„Исклучително сме среќни да пречекаме таков редок и уникатен човек на уметноста со таков неверојатен талент и убедувања“, коментираат директорите на филмскиот фестивал Пјер Лескур и Тиери Фремо во заедничката изјава.
Како што забележуваат некои западни медиуми изборот на Бланшет сигурно не е случаен покрај променливиот изглед на Холивуд во моментов. Токму таа беше една од првите жени кои упатија јавно обвинение против продуцентот Харви Вајнштајн за сексуална злоупотреба, а оваа недела таа официјално ја реализира и иницијативата Time's Up ( „Времето истече“) за борба против системската сексуална злоупотреба против жените во кино индустријата, а исто така и во големите корпорации.
