,

8 години модна поезија на Росица Мршиќ

Таа е оригинална, различна, своја. Вљубена во формите, лесно ги преточува во своја модна визија која е единствена. Нејзината облека пркоси на времето, не дозволувајќи да биде заробена во неговиот формат. Во модниот свет, како во Македонија, така и во светот, се наметнува по својата препознатливост. Нестрашлива во експериментирањето со бои и дизајн, создаде бренд кој бележи 8 успешни години постоење. Разговаравме со Росица Мршиќ, дамата која создава модна поезија, притоа градејќи и негувајќи посебна естетска вредност и авангарден печат на модниот израз. 8 моменти кои ви ги одбележаа 8те години од постоењето на Вашиот бренд:
          • отворање на салонот за продажба,
          • учество на првите Модни викенди,
          • победник за Русија & Европа, и еден од петте светски финалисти на натпреварот International Bulgarian Fashion Award EIRENE 2013
          • продажба во концептуални бутици во Софија, Виена, Дубаи, Лугано, учествување на интернационални модни саеми
          • дизајни за домашни производители
          • започнување на сопствена онлајн продавница на брендот
          • учество во проект „Превенција на малолетнички бракови преку економска независност“
          • малиот жолт фустан за „Фустан на 21 век“ на „Мода естетикс“ од Амстердам.
8 парчиња од вашите колекции кои ги издвојувате како носечки на Вашите колекции:
            • црниот фустан со асиметрични карнери од првата колекција
            • брокатниот балонер со нагласени ракави од колекцијата инспирирана од ’Климт
            • црниот фустан од транспарентни слоеви, од зимската колекција, инспирирана од Русија
            • мини балон здолниште, печатено со сопствен принт од инсекти
            • модро синиот асиметрично драпиран фустан од африканската колекција
            • црниот драматичен чипкан фустан, од претпоследната зимска колекција ’Raven’
            • белиот архитектонски фустан од сезоната пролет / лето 2015
            • белата блуза со плисиран црн детаљ од колекцијата ’Iris’
8 дами кои се инспирација за Вашиот бренд:
            • Coco Chanel
            • Elsa Schiaparelli
            • Miuccia Prada
            • Jeanne Lanvin
            • Rei Kawakubo
            • Vivienne Westwood
            • Sonia Rykiel
            • Madeleine Vionet
8 парчиња со кои ќе ја најавите Вашата најнова колекција
            • шик блузон
            • бомбер јакна со еко крзно
            • брокатни панталони
            • капут во комбинација со еко крзно
            • фустан со рачно изработени и аплицирани детали
            • сукња со фалти
            • блузон од монистри
            • панталони кулоти
Женски Магазин Која е бојата која најмногу ве одразува? Мршиќ Црната, затоа што најдобро ја изразува елеганцијата, формата и моќта, и затоа што одлично се комбинира со белата како контраст, како и со сите останати бои. Затоа што е најкомплетна боја, и прилега секому. Женски Магазин Своите колекции ги најавувате на специфичен начин. Која е пораката која наскоро ќе ни ја пратите? Мршиќ Начинот на презентирање на секоја колекција на модни парчиња облека е важна за комуникацијата со публиката на која се обраќа. Важно е да се постигне поврзаност и разбирање на идејата на дизајнерот со модната јавност и затоа различноста на секоја колекција бара соодветно претставување. Женски Магазин Која е дамата на која и се обраќате со новата колекција? Дали тоа се млади жени или дами кои моќно чекорат во животот? Мршиќ Жените стануваат сè поприсутни во јавниот живот и во него се вклучуваат веќе на помлада возраст, па не постои цврста разлика помеѓу младоста и успешноста. Комуникацијата е насочена кон модерни, успешни и космополитски жени, со истенчен и префинет вкус, кои се силно свесни за своите квалитети и тоа сакаат да го покажат и преку изборот на облеката што ја носат. Женски Магазин Здолниште, фустан или панталони. Што најчесто избирате кога сакате да се мотивирате пред некој клучен состанок? Мршиќ Убаво се чувствувам во сите три форми на комбинирање на облека, а изборот го правам врз основа на моментална инспирација. Женски Магазин Која е пораката која ја добивте од Вашата мајка кога ја започнавте својата кариера? Мршиќ Биди најдобра во сè што правиш, биди секогаш иновативна и негувај ја сопствената препознатливост. Женски Магазин Која е визијата која по 8 години ја имате за вашиот бренд во иднина? Мршиќ Да продолжам со развој на брендот на домашната сцена и да го засилам значењето на брендот на меѓународната модна сцена. За Женски МагазинВики Чадиковска Насловна фотографија Томислав Георгиев Преземање на текстот е можно само со дозвола од редакцијата на Женски Магазин