Денес се празнува Свети Нестор, денот кога се исполнуваат сите желби: Треба да направите само една работа

Добивај вести на Viber

Православната македонска црква денес го празнува споменот на Светиот Маченик Нестор, кој со благослов на Свети Димитрија, го убил гладијаторот Лео.

Со празнувањето на овој празник во Македонија се поврзани повеќе обичаи и верувања. Според народното верување во Кумановско овој ден се смета за празник на глувците, па и оттаму празникот помеѓу народот е познат како „глушчов ден“. На овој ден не се работи за да не го јадат глувци житото и брашното.Според верувањето тогаш не се буричка во брашното и не се дава заем за да не го разнесуваат глувците. Истото верување е забележано и во Битолско.

На овој ден се саделе овошки и лози зошто се верувало дека сигурно ќе се фатат. Свети Нестор, за свој покровител го имале мајсторите (ѕидарите).

Преданието вели дека на сите оние кои денес искрено му се молат на Свети Нестор ќе им биде исполнета секоја желба.

Во времето на страдањето на свети Димитриј Мироточивиот, во Солун живееше еден млад човек по име Нестор, којшто на верата се научи од самиот свети Димитриј. Во тоа време, христоборниот цар Максимијан приредуваше разни игри и веселби за народот. А љубимец на царот му беше еден вандалин по име Лиј, со голијатски раст и сила. Како царски гладијатор, Лиј секојдневно ги предизвикуваше на мегдан луѓето и ги убиваше. Крволочноста на овој Лиј го развеселуваше крволочниот идолски цар. За борбите на Лиј царот направи посебна сцена, како една тераса на столбови. Долу под терасата имаше забиено копја со остриците устремени нагоре. Кога Лиј ќе победеше некого во борење, ќе го фрлеше одозгора од терасата врз цела една шума од исправени копја. Наоколу стоеше незнабожечкиот народ со својот цар и се развеселуваше кога некое бедно човечко суштество ќе се виткаше во маки на копјата сè додека не издивне. Меѓу невините жртви на Лиј беа и многумина христијани. Зашто во деновите кога никој доброволно не се пријавуваше за борба со Лиј, тогаш по царска наредба насилно ги довлечкуваа христијаните на борилиштето. Гледајќи ги тие ужасни разоноди на незнабожечкиот народ, на свети Нестор му се кинеше срцето од болка. И тој реши самиот да излезе во борба со џиновскиот Лиј. Но, претходно отиде во затворот кај свети Димитриј за да побара од него благослов за тоа. Свети Димитриј го благослови, го прекрсти со знакот на крстот на челото и на градите и му прорече: „Лиј ќе го победиш, но за Христа ќе пострадаш.“ Младиот Нестор значи му излезе на мегдан на Лиј. Беше присутен и царот со толпа народ; и сите го жалеа младиот човек зашто ќе загине и го одвраќаа од борбата. Но, Нестор се прекрсти и рече: „Боже Димитриев, помогни ми!“ И со Божја помош Нестор го совлада Лиј, го собори и го турна врз копјата, каде што тешкиот џин брзо умре. Тогаш сиот народ викаше: „Голем е Бог на Димитриј!“ А царот се посрами пред народот, се нажали по својот љубимец Лиј и многу се разгневи на Нестор и на Димитриј. Па овој свиреп цар нареди и Нестор го убија со меч, а Димитриј го избодоа со копја. Тогаш го заврши својот овоземен живот славниот христијански јунак Нестор, во 306 година, кога се пресели во Царството на својот Господ.