Прошетките се лек за децата со нетипичен развој: Ребека револтирана од новите мерки за забрана
Родителите на децата со нетипичен развој, меѓу кои е и поп-пејачката Ребека, реагираат на новите мерки што ги донесе Владата, од среда полицискиот час да трае од 16 до 5 часот наутро, а за време на викендите движењето да биде целосно забрането.
„ Децата (лицата)со нетипчен развој и со аутистичен спектар не можат да разберат што се случува и нивните секојдневни рутини се неминовен дел од нивното секојдневие. Уште од почеток на вонредната состојба поради вирусот, ни требаше време за да создадеме атмосфера за подобро расположение на моето дете и тој да навикне на новите секојдневни активности. Секој ден мора да се изнесе и да прошета онака по маало или до центар и назад, тоа е лек за него“, вели Ребека за синот Маркијан кој страда од ретката болест, туберна склероза.
Неколку мајки на деца со нетипичен развој на социјалните мрежи остро реагираа против новодонесените мерки поради заштита од ширењето на коронавирусот.
„Од 40 родители, на 35 оваа мерка им е повеќе од тешка. Како ќе се објасни ова на децата со посебни потреби кои имаат свои рутини: Прошетки, возење во автомобил. Свесни сте дека и така изгубеното здравје се нарушува дополнително? Дете со типичен развој ќе го разбере ова. Дете со атипичен НЕ!“, напиша на својот Фејсбук профил Ирена Николовска- Ристановска, мајка на дете со аутизам. Ребека и многу други родители ја поддржаа.
„Голем дел од овие деца не сакаат воопшто маски да стават. Би требало семејствата да имаат дозвола да ги изнесат во придружба на еден родител, старател и во друг термин во денот и за време на викендот. Секако, со потврда од социјалните служби или со наод доктор специјалист, кој овие овие семејства веќе го имаат за добиено за своите деца“, изјави Ребека за Женски магазин.
Таа за крај додава дека е многу тешко на децата со аутистичен спектар на однесување да им се објаснат овие мерки. „Тие и онака не се дружат со останатите деца надвор, само им треба куса прошетка во текот на денот според своите потреби и секојдневни нови рутини кои едвај ги воспоставивме со новите мерки“, вели пејачката која е основач и претседател на здружението на граѓани за лица со дисфунцкии, хендикеп, ретки болести и посебни потреби, „Дајте ни крилја“.
Ребека со трите сина: Маркијан и близнаците Макариј и Доротеј
Во претходно интервју за Женски магазин, Ребека ја раскажа историјата ан болеста на синот.
„ На тримесечна возраст прв пат ги забележавме симптомите - епилептични напади. Од тој момент почнаа сите детални испитувања и патувања, консултации низ многу болници (Белград, Љубљана, Загреб, Верона, Варшава, Парис, Њујорк). Денот ни започнуваше со прашањето дали и колку напади ќе има, дури имаше и периоди кога во еден ден забележувавме и по стотина напади. Во такви услови мора да работат двајцата родители, се чувствувате како да сте постојано на трака за трчање, а не ви дозволуваат да се симнете и згора на тоа, се чувствувате беспомошно. Времето е вашиот најголем непријател. Го гледате детето пред вашите очи како се бори за живот и барате терапија која ќе му ги сопре нападите. На два пати Маркијан за малку ќе го изгубевме. Молитвите и вербата во Бога, разговорите со него, беа мојот спас“, раскажа Ребека.
Маркијан денес е среќен што освен Реебка и нејзиниот сопруг Милан, како најголема поддршка ги има браќата, шестиопол годишните близнаци, Доротеј и Макариј.
М.Џаровска
