Сама си правам маска за лице со мед и млеко: Пред огледало со Емра Куртишова

Познатата актерка од Театарот за деца и младинци, која пошироката јавност ја засака по ликот на Исаура во популарната ТВ-серија „Преспав“, има интересни ритуали за убавина. Емра Куртишова лицето го негува со маска што самата си ја подготвува, а козметички салони посетува само кога има потреба од длабока хидратација. Кој е нејзиниот омилен парфем, што секогаш носи во несесерот и како ја одржува линијата, дознајте во продолжение 

* Каков е Вашиот дневен козметички ритуал?

- Зависно од тоа какви ми се обврските во текот на денот, одлучувам дали ќе го поминам со шминка или без. Се разбира, започнува со миење лице, крема, а доколку е потребно и шминка. По завршувањето на обврските, најубавото чувство е кога ја отстранувам шминката. Не користам мицеларна вода, бидејќи сум пробала повеќе брендови и ниедна не ми одговара на кожата. Сосема случајно ми ја открија пената за миење лице на „Бекутан“ и сум презадоволна.

* Со какви препарати го негувате лицето?

- Обично купувам производи кои не се тестирани на животни, внимавам да се на природна база, но најчесто користам домашно подготвена маска од куркума, мед и млеко - кој не ја пробал, нема да зажали.

* Посетувате ли козметички салони?

- Со оглед на тоа дека кожата на лицето ми е без значајни недостатоци, поретко, но кога имам потреба од длабока хидратација се разбира дека посетувам.

* Кои производи ги употребувате за нега на коса?

- Користам поблаги шампони и регенератор за коса. Секако тука е и аргановото масло кое е неизбежно. Ги користам и ампулите за оштетена коса на „Lakme“ бидејќи последниов период косата ми имаше доста чести „средби“ со фигара и пегли.

* Што сакате да прикриете, а што да истакнете со шминка?

- Ги прикривам темните кругови околу очите, а ги истакнувам очите и усните.

* Кои се Вашите омилени козметички производи?

- Крема за лице, раце и тело, моливче за усни, маскара и руменило.

* Што носите секогаш во Вашиот несесер?

- Пудра, маскара, молив за усни.

* Кој е Вашиот омилен парфем?

- Засекогаш Ј'adore DIOR

* Како ја одржувате линијата?

- Никако, таа ме одржува мене (се смее). Никогаш досега не сум имала проблем со килограмите, тоа е така поради генетиката. Јадам кога сакам и колку сакам, но, промена нема и среќна сум поради тоа. А, заради одржување на кондиција си ветив себеси дека повторно ќе ѝ се вратам на теретаната.

Ѓ.С.