Таа е белег на Силви Бенд: Хит песната „Ангели ме носат“ има посебна приказна
Секој рефрен има своја приказна. Уметниците гордо раскажуваат за своите дела, особено ако успеале да создадат песна која го надживеала времето во кое е создадена. Особено интересни се приказните кога хитовите првично им биле понудени на други изведувачи, но од различни причини не ги прифатиле. Рубриката „Викенд интермецо“ е серијал преку кој уживате во македонските хитови, но и дознавате како истите настанале.
„Ангели ме носат“ (Силви бенд)
Македонски евергрин, макфестовска композиција која малкумина знаат дека е потпишана од Драган Вучиќ. Стиховите се дело на легендарниот радиоводител и автор, покојниот Ѓоко Георгиев.
- Уште додека ја снимав во студиото на Македонско радио забележав дека продуцентите многу убаво реагираат и уште тогаш велеа дека оваа песна ќе биде една од наградените. За мене тоа беше прво фестивалско искуство. Добивме трета награда од публика и награда за најдобра интерпретација. Следната година „Ангели ме носат“ беше прогласена за најслушана песна меѓу двата фестивала. Таа песна остана наш белег, рефрен по кој нѐ препознаваат – изјавија Силви и Влатко Плевнеш за порталот „Публицитет“.
Фото: Youtube/screenshoot
