За стилот со Ива Милошевска: Ако нешто мразам, тоа се наметнати „калапи“ во стилот
Преферира накит и чанти, и вели дека со нив и наједноставната модна комбинација може да изгледа шик
Сопственичката и менаџер на ексклузивниот италијански накит „Rebecca“ во Македонија, Ива Милошевска, специјално за „Женски магазин“ открива дел од својот гардеробер.
Кои се нејзините омилени парчиња облека и што за неа значи стилот, откријте во продолжение.
* Дефиниција за стил?
- Начин на живеење, на однесување и на уникатно естетско изразување на една личност.
* А, Вие стилски се дефинирате како...
- Eдноставна и одмерена личност, со посебна почит кон уметноста, културата и убавото однесување.
* Што е пресудно за добар стил?
- Рафинираноста, космополитизмот и вроденото чувство за убавина.
* Комбинирате елегантно со спортско или сте камелеон во облекувањето?
- Комбинацијата на спортско и елегантно е мојот прв избор, со посебна почит кон уникатни и креативни модни автори.
* Минимализам, хедонизам, авангарда?
- Дефинитивно минимализам со мали примеси на дизајнерска авангарда.
* Гламур или класика?
- Прв избор: секогаш класика.
* Омилени нешта од вашата облека?
- Аксесоари, особено накит и чанти.
* Дали практикувате брендирана облека или не ви е пресудна етикетата?
- Апсолутно етикетата не е пресудна, најважно ми е да се чувствувам своја и комфорно во она што го носам.
* Што сакате да постигнете со вашиот стил?
- Комоција и естетски баланс пред сѐ.
* Дали ако сте автентична, тоа значи и осудување од нашава средина?
- Ако нешто мразам, тоа се наметнати „калапи“ во стилот, а во повеќето случаи таквите отстапувања од наметнатото, за жал, водат кон осудување.
* На кој дизајнер би му дозволила да ви го преуреди гардероберот?
- Комплетно преуредување, дефинитивно од Александар Ношпал кој ме познава од моја седум годишна возраст, а совет би побарала во секое време од Јована Филиповиќ и Игор Марков.
* Што облекувате денски, а што навечер?
- Денски е секогаш кежуал. За на работа никогаш немам ставено на себе штикли, а навечер, зависно од пригодата, знам да направам и похрабар избор.
* Дали експериметирате со косата и шминката?
- Како и секоја девојка, експериментирав до свои 19 години, но сега веќе не. Средна должина на коса во природна боја и минимална шминка за секој ден, а за некои посебни прилики Даниел Николовски, Октај или Дадар знаат да направат магија.
* Ваши трикови за брз, но ефектен изглед.
- Убав накит и ефектна чанта можат да направат и наједноставната комбинација да изгледа шик.
Даница Караташова Илиоска
