ПОЗИТИВ НА ДЕНОТ: Научете ги децата да бидат среќни!
Си одел еднаш стар мудрец по пат, ја набљудувал природата и уживал во силните пролетни бои. Одеднаш здогледал еден маж кој на рамениците носел тежок товар. Дури и нозете му се треселе од тежината.
Мудрецот прашал:
„Зошто самиот се осудуваш на толку тешка работа и страдање?“
Човекот одговорил:
„Се мачам за моите деца и внуци да бидат среќни. Мојот прадедо се мачеше и имаше тежок живот за доброто на мојот дедо, дедо ми за доброто на татко ми, татко ми заради мене, а јас ќе се помачам за среќата на моите деца.“
Тогаш мудрецот рекол:
„А дали некој во вашето семејство бил среќен?“
Човекот вратил:
„Досега не, но сметам на тоа дека моите деца и внуци ќе бидат среќни.“
Старецот го погледнал и му рекол:
„За жал, неписмениот човек не може да чита, исто како кртот не може да одгледа орел. Најпрво мораш самиот да научиш да бидеш среќен, а дури потоа ќе можеш своите деца да ги научиш да бидат среќни. Тоа ќе им биде најскапоцениот подарок од тебе.“
