Не учете ме што е љубов.
Не е лекција којашто сум
ја испуштила
оти сум побегнала од час.
Не е хемиска реакција
која завршила со сол
и вода
оти погрешно сум
балансирала реагенси.
Не, љубовта не е цијанид,
оти мајчиното млеко со
кое сум доена,
паметам, слатко беше.
Не е коска, љубовта,
оти со пердуви
ме галела по темето.
Не е ни крв
оти не мириса на челик
на пареа од камилица
ѝ личи реата.
Не е љубовта војна,
силување на умот
и телото,
грабеж на интелектот
и идентитетот,
лелек што на партали
сече небеса,
морија што гази
паднати
ангели.
Ако знаевте што е љубов,
ќе споделевте среќа
и надежи,
ќе опевавте младешки
копнежи,
ќе гледавте усни со
црвила,
а не души во црнина.
Не поганете јазик
говорејќи за историја,
седнете, пишувајте ја
сегашноста,
да не ни отиде зијан
иднината.
За Женски магазин, поетесата Тања Кармзова Костиглиола
