„Забранета магистратура“ е книга на авторот Александар Попоски која ќе се промовира на 19ти октомври, четврток, во хотел „Александар Палас“ од 18.00 часот.
Книгата „Забранета магистратура“ првично е пријавена како магистерски труд на Економскиот факултет при Универзитетот „Св. Кирил и Методиј“ во Скопје со наслов: „Системски ризик и санација на банкарските системи – вовед кон паралелна приватизација во Република Македонија, со посебен осврт на „Стопанска банка“ А.Д. Скопје, улогата на правниот систем и институциите на државата“.
„Иако пријавените тези од овој магистерскиот труд беа успешно одбранети на Економскиот факултет на 26 декември 2014 година, сепак, целосното истражување во голем дел беше цензурирано и повеќе од преполовено. Од истражувањето се отстранија многу составни делови, истражувачки стории, пет студии на случај кои ги поткрепуваа тезите на истражувањето, како и сите материјални докази кои беа ставени како прилози на магистерскиот труд и студиите на случај, за кои сметам дека се од национално значење.“ вели авторот Александар Попоски.
Во книгата е дадена теоретска и практична подлога на појавите на системски ризик и финансиски кризи во различни економии, политики и механизми за справување со системски ризици и финансиски кризи, политики и модели за враќање на солвентноста во економијата, банкарски санации во повеќе земји од светот со различен степен на финансиско-правна и политичко-демократска развиеност (компаративни анализи – од најразвиени земји до транзициски економии), како и санацијата на банкарскиот систем во Република Македонија и улогата на целокупниот правен систем и институциите на државата преку анализа на повеќе студии на случај од македонската економија.
„Конкретно, се работи за книга која опишува делови од процесите на македонската транзиција и фамозната приватизација, поточно на еден феномен кој во книгата е дефиниран како „паралелна приватизација“ во Република Македонија која се појави како резултат на санацијата на банкарскиот систем по нејзиното осамостојување, слабите правно-судски институции и основањето на Агенцијата за санација на банки, која го презеде управувањето со повеќе од 400 општествени претпријатија. Или како што ќе каже еден народен пратеник во законодавниот дом: „…Синонимот на македонската трагедија во овие дваесетина години…“ додава Попоски.
