Да не беше Тоше, немаше да одржам концерт пред 20.000 публика: Самарџиќ за пријателството со Проески

Добивај вести на Viber

Жељко Самарџиќ во повеќе наврати има изјавено дека негов близок пријател беше Тоше Проески. Самарџиќ, кој пред две недели беше гостин во Скопје, на свадбата на менаџерот Кристијан Стефановски, се присети на дружбата со Тоше.

„ Се запознавме во Охрид на еден фестивал. Тој ми пријде, ми подари негова касета. „Одлепив“ на неговиот глас. Некоја година подоцна, се сретнавме пак на фестивал во Херцег Нови. Беше пораснат, не го препознав. Го прашав: „Од каде си момче?“ Кога ми кажа дека е од Македонија му одговорив: „Има еден пејач, се вика Тоше, фантастично пее, имам негова касета“. Ми се насмевна онака како што тој знаеше и ми рече: „Па, јас сум тој“. Од тогаш, станавме пријатели. Потоа отидов да го поддржам на неговиот прв голем концерт во белградската Арена на 14 февруари во 2007 година, а тој а да ми возврати веднаш пред цела публика ми го изрекламира концертот за осми март, во истата сала. И тоа беше еден од моите најпродавани концерти во кариерата, продадовме 20.000 билети благодарение на Тоше. Многу ми недостасува“, вели Жељко.

„Кога слушнавме што се случило, мојот менаџер Саша и јас, право од Германија заминавме во Крушево, во куќата на родителите на Тоше да им изјавиме сочуство. Воопшто не застанавме во Белград. Без оглед на нашата генерациска разлика, тоа беше едно прекрасно пријателство“, ни раскажа Самарџиќ кој е секогаш добредојден гостин кај македонската публика. (М.Џ.)