Дали „Нептун“ наплаќа двојна камата при купување на рати со картичка?

Дали компанијата за продажба на техничка стока „Нептун“ им наплаќа двојна камата на муштериите кои купуваат со картичка на рати? Примерот на кој ни укажа еден потрошувач отвора сериозни дилеми, кој треба да биде сигнал за соодветните инспекции и државни институции да направат контрола на нивното работење.

Имено, откако потрошувачот побарал износот да го плати со картичка и да му биде поделен на пет рати, на каса му била пресметана дополнителна камата од 5 отсто. Оваа нова давачка, која ја зголемила цената на производот, никаде не била објавена, со што на потрошувачот му била наплатена друга, повисока, цена од јавно истакнатата цена на производот, што е законска обврска за трговецот. Со ова, купувачот двапати ќе плати камата, еднаш на „Нептун“ и втор пат на банката или финансиската институција која ја издала картичката.

При ваков тип на плаќање, вообичаено е трговецот само да ја провлече картичката на ПОС терминалот и да го внесе бројот на ратите, а купувачот да го потпишеслипот, на кој има информации за бројот на рати, и со тоа да ја потврди трансакцијата. Веднаш потоа, банката прави резервација на целиот износ од кредитната картичка и секој месец ќе одзема една рата од износот на клиентот. Но, трговецотќе го добие целиот износ од трансакцијата без да чека на дополнителни одобрувања, што би било случај ако купувачот зема класичен банкарски кредит, за кои се потребни низа документи.

На нашето прашање зошто на потрошувачот му е наплатена камата, од „Нептун“ ни одговорија:

- Купопродажбата на производот на наведената фискална сметка е реализирана со Diners картичка на 5 рати со камата. Во наведениот периодот за купување на 5 рати со Diners картичка се пресметува камата во висина од 5 отсто- изјавија во „Нептун“.

Но, во „Нептун“ останаа неми на нашето дополнително барање да ни го достават документот врз основа на кој во наведениот период за купување на 5 рати со Diners картичка се пресметува камата во висина од 5 отсто.

Од друга страна, нејасно е како „Нептун“ пресметува камата кога не е финансиска институција и истата ја впишува во фискална сметка кога каматата не подлежи на ДДВ. Она што е најсимптоматично е дека на фискалната сметка стои дека износот е платен во готово, иако тој бил наплатен со картичка и на рати.

- По однос на описот на начинот на плаќањето истото се врши со избор на самиот оператор (плаќање во готово или плаќање со картичка). Во зависност од начинот на плаќање, обврска на операторот е да го избере начинот на плаќање- ни одговорија во Управата за јавни приходи на прашањето дали е исправна фискалната сметка издадена во овој случај.

Од Народна банка на Македонија побаравме објаснување дали „Нептун“ може да пресметува камата, но оттаму изјавија дека тие се надлежни за работата на банките, додека контролата на трговските друштва не спаѓа во нивен домен.

Во Организацијата на потрошувачи на Македонија за овој случај рекоа дека е евидентно дека има низа недоследности и го повикаа купувачот, а и другите кои се соочиле со сличен проблем, да се обратат кај нив за бесплатна стручна помош.

Оригиналниот текст на Фактор.мк