Душко Трифуновски ќе ги промовира драмите „Слана / Јазол“ кои се слика за тешката општествена стварност
Книгата со двете драмски дела „Слана / Јазол“ од младиот автор Душко Трифуновски ќе биде промовирана на 15 јули (четврток), во 19 часот, во книжарницата „Литература.мк“ на улицата „Македонија“. Во книгата, која е во издание на „Попули“, по првпат на едно место можат да се прочитаат двете драми на Трифуновски – „Слана“ и „Јазол“ – инаку веќе автор на романот „За два дена рече ’Да‘“. Станува збор за две драми што творат совршена целина и треба да се читаат како два дела на една иста приказна.
Во „Слана“ (веќе еднаш објавена во 2015 година) се запознаваме со брачните партнери Злате и Стојна и нивните деца, Виктор, Маја, Кристина и Марија. На речиси натуралистички начин, Трифуновски ни го покажува нивното тешко и траорно постоење, во економска и општествена стварност на (никогаш споменатата, но очигледно присутната) современа Македонија. Како што ги снемува парите, така со нив исчезнуваат и вредностите на стариот систем во кој владее зборот на таткото, а младите се желни за своето место под сонцето.
Во „Јазол“, пак, натуралистичкото перо на Трифуновски е надополнето со елементи на фантастика и примеси на надреалното. По тешките случувања во „Слана“, духовите на мртвите доаѓаат да ги мачат и да ги опседнуваат живите, кои сè уште се борат за егзистенција во тешкиот и суров современ свет. Покрај развојот (или падот) на семејството на Злате, во овие две драми можеме да го видиме и развојот во стилот на младиот автор, кој бестрашно се впушта во нови писателски искушенија.
Душко Трифуновски е роден на 27.2.1997 година во Скопје. Средно образование завршува во СЕПУГС „Васил Антевски-Дрен“, како правен техничар, а дипломира на Филолошкиот факултет „Блаже Конески“, стекнувајќи се со називот професор по македонски јазик и литература. Паралелно се занимава со работата како наставник и со книжевна дејност, учествувајќи на разни конкурси и манифестации. Во 2015 година го објавува самостојно својот прв роман, „Слана“, и истата година за него добива награда за книга со трајни семејни вредности. Во 2016 година првпат објавува драмска преработка на романот и го носи истиот назив, за да покаже дека умее да трансформира еден род во друг. Во 2016 година го објавува електронски романот „За два дена рече ’Да‘“ на е-библиотеката „Македоника“ и истата година добива награда од УНЕСКО за најчитан роман на млад автор.
Промоцијата, која ќе се одржи на терасата на книжарницата „Литература.мк“, ќе ја води уредникот на книгата, Ведран Диздаревиќ.
Книгата „Слана / Јазол“ веќе е достапна во сите книжарници „Литература.мк“ и онлајн на интернет-страницата www.literatura.mk на следниот линк:
https://literatura.mk/BookDetails.aspx?Pr=14494
ПР објава
