ПРЕД ОГЛЕДАЛО со Надица Горгиева: Во чантата не носам ни козметика, ни огледалце
Многумина сметаат дека токму таа е една од најубавите жени во Македонија, а Надица Георгиева го потврдува тоа и во петтата деценија од својот живот. Посветената сопруга и мајка, како и ексманекнка со успешна кариера зад себе, пред огледалото на Женски Магазин ги открива тајните на својата безвременска убавина.
* Каков е Вашиот дневен козметички ритуал?
- Наутро, после класично миење на заби и лице, нанесувам дневна хидрантна крема со заштитен фактор, потоа ставам лесен „мејкап“ за преку ден и огледалото го заборавам. Навечер никогаш не легнувам со нечиста кожа. Обавезно миење и чистење на лицето со тоник за сензитивна кожа, нанесувам серум, па ноќна хранлива крема за позрела кожа. Тоа е се.
* Со какви препарати го негувате лицето?
- Препарати што може да се најдат во нашите продавници. Обично се за позрела кожа и доста хидрантни. Не е важно дали се скапи или евтини препаратите, важно е добро да одговараат на кожата, а тоа се чувствува после првото користење.
* Посетувате ли козметички салони?
- Да, околу 5-6 пати годишно.
* Кои производи ги употребувате за нега на коса?
- Мојата коса е многу лесна за одржување, или што би се рекло пери - носи. Одам на фризер еднаш до двапати неделно. Било каков шампон и балзам ќе завршат работа. Тоа е тоа.
* Што сакате да прикриете, а што да истакнете со шминка?
- Неман што да прикривам на моето лице. Кожата ми е чиста и негувана. Со лесен „мејкап“ , многу маскара и кармин во месо боја го добивам ефектот што го сакам. Преферирам истакнати очи, тие се огледало на душата.
* Кои се Вашите омилени козметички производи?
- Користам различни козметички производи. Омилени ми се кремите на „Estee Lauder“, особено ноќниот серум „Night repair", мулти наменската крема „Eight hour" на Елизабет Арден, млеко за тело на „L'occitane“ и други.
* Што носите секогаш во Вашиот несесер?
- Во мојот несер има само „мејкап“ и тој останува дома. Во мојата чанта не носам никаква козметика, ниту пак мало огледалце. Само неопходни работи, како портмоне, мобилен телефон, пенкало, клучеви и апче за главоболка.
* Омилен парфем?
- Парфемите ги менувам во зависност од расположението, но омилен за зимскиот период ми е „Knowing" на Estee Lauder, а за топлите денови „Chance" на Chanel.
* Како ја одржувате линијата?
- Многу лесно, јадам сѐ што ќе посакам, но во мали количини, или почесто 3-4 пати на ден, но помалку. Се хранам така како што јас мислам дека му одговара на моето тело, а не затоа што научниците ќе ми кажат што е здраво, а што не. Не јадам риба, не јадам сладолед и не јадам овошје. Едноставно не ми одговара. Не вежбам, но сум во постојано движење.. Пешачам многу, околу 10 км дневно и тоа ме одржува во одлична форма.
Даница Караташова
Фото: Дејан Миличевиќ
