Се негувам со бебе крем: Пред огледало со Ана Брзанова

Моделот и стипендист на Економски факултет, која неодамна се закити со титулата Најдобар модел во свечена тоалета  на изборот „Најдобар топ-модел на светот“, во Хургада, Египет, гевгеличанката Ана Брзанова (19), специјално за „Женски магазин“ ги открива своите ритуали за убавина. Вели, нејзиното лице има премногу колаген и не и се потребни третмани, а  најомилен козметички производ и е млекото за тело. Кој е нејзиниот омилен парфем и што носи во несесерот, откријте во продолжение.

*Каков е Вашиот дневен козметички ритуал?

- Не дека има некаков посебен ритуал меѓутоа секојдневна рутина ми е чистењето на лице, околу два пати дневно и ставањето крем после секое миење, како на лице така и на раце. Можам да кажам дека ми е некаков вид на навика.

*Со какви препарати го негувате лицето?

- Пред две години, после разговор и преглед со стручно лице, ми беше утврдено дека моето лице има премногу колаген и дека не се потребни никакви третмани и дека е доволно само бебе крем. И искрено тоа најмногу ми одговара. Меѓутоа, користам секојдневно при чистење мицеларна вода, како и пена за чистење на лице.

*Посетувате ли козметички салони?

- Хаха, обожавам кога не се мачам самата за да се средам. Посетувам козметички салони, но не многу често. Би сакала воедно да се заблагодарам сега на мојот спонзор Silhouette- Apollonia кои несебично се вклучени во негата за мојот изглед.

*Кои производи ги употребувате за нега на коса?

-При нега на мојата коса можам да го издвојам средството за заштита од топлина на косата, бидејќи често знам да ја пеглам или фенирам. Вообичаено после миење на коса, користам  арганово масло.

*Што сакате да прикриете, а што да истакнете со шминка?

- Преку шминка најчесто прекривам црвенила и акни, притоа доколку станува збор за денска шминка, најчесто ги истакнувам јаболчниците, или при ноќна шминка се трудам да ги истакнам очите.

*Кои се Вашите омилени козметички производи?

- Од козметички производи како најомилени би ги издвоила млекото за тело и кремот за лице и раце бидејќи без тие не би можела.

*Што носите секогаш во Вашиот несесер?

- Коректор, балсам за усни, крем за раце- доколку зборуваме за козметика, а од дома не изглегувам без полнач и слушалки за телефон.

*Кој е Вашиот омилен парфем?

- Versace- Bright crystal со сигурност!

*Како ја одржувате линијата?

- Искрено немам некоја посебна исхрана. Јадам брза храна, не јадам многу благо, и самиот организам ми бара 1-2 пати најмалку салата на ден. Едноставно така функционирам. И се разбира се трудам колку дозволува времето, секојдневно да бидам физички активна.

Л.С.