Во Венеција сите се бесни за свадбата на векот на која доаѓа и Трамп: Клуни беа добредојдени, Безос и Лорен НЕ
Кога Џорџ и Амал Клуни се венчаа во Венеција во 2014 година, градот беше во затвор - Големиот канал беше затворен, тесните улички беа преплавени со папараци и познати личности. Сепак, Венецијанците тогаш со гордост го прифатија спектаклот, радувајќи се што нивната позната лагуна повторно беше во центарот на светското внимание.
Меѓутоа, најавата дека Џеф Безос, милијардерот и основач на Амазон, и неговата вереница Лорен Санчез, поранешна ТВ водителка, ќе се венчаат оваа година во Венеција, не наиде на истиот ентузијазам.
Тринеделни свадбени планови
Според италијанските медиуми, идејата венчавката да се одржи во Венеција била на Доменико Долче, италијански моден дизајнер. Минатата година тој му предложи на Морис Шерон, шефот на кабинетот на градскиот совет на Венеција, оваа двојка да ја избере Венеција за нивниот „магичен“ ден.
Венчавката е закажана за периодот од 24 до 26 јуни, а организаторите веќе резервираа пет од најлуксузните хотели во градот, речиси цела флота на водени такси, па дури и пристаниште за мегајахтата на Безос. Се очекува доаѓање на стотина гости, а меѓу нив може да се појави и американскиот претседател Доналд Трамп.
Градоначалникот поддржува, граѓаните негодуваат
И додека Венеција воведе такси за дневни патници во последниве години за да се намали пренатрупаноста, градоначалникот Луиџи Брунјаро не гледа проблем со настанот. Напротив, тој јавно му се заблагодари на Шерон за привлекувањето на двојката во Венеција, посочувајќи дека венчавката ќе донесе економски придобивки од милиони евра.
Но, не секој го дели неговото мислење.
„Ќе биде огромна мака“, вели Франческа, туристички водич, како што пренесува „Гардијан“.
„Веќе сме исцрпени поради масовниот туризам, а сега ни наметнуваат уште една работа што треба да ја издржиме.
Таа се присетува на свадбата на Џорџ Клуни, која исто така предизвика хаос во градот, но нагласува дека тогашната атмосфера била поинаква.
„Клуни и неговата сопруга, која е адвокатка за човекови права, беа добри и пријатни. Изгледаа помалку наметливи. Со Безос и компанијата, немаме идеја што да очекуваме“.
Список на гости - ѕвезди и политичари
Меѓу гостите може да се најдат Ким Кардашијан, Опра Винфри, Ева Лонгорија, Леонардо ди Каприо, Орландо Блум и Кети Пери. Наводно, поканети биле и ќерката на Трамп, Иванка и нејзиниот сопруг Џаред Кушнер. Безос и Санчез седеа во првиот ред на инаугурацијата на Трамп во јануари, па не е исклучено и американскиот претседател да присуствува на венчавката.
Иако локацијата на церемонијата се уште не е потврдена, се шпекулира дека Дуждовата палата, некогашното седиште на власта на Република Венеција, би можело да биде изборот на младенците.
„Се продаваме на оној што ќе понуди“
Џуси Џудис, друг туристички водич, смета дека Венецијанците се навикнати на големи настани и дека приговорите се неоправдани.
"Сите заработуваме пари од ова. Дали луѓето едноставно им љубоморат на богатите? Не им пречеше кога Клуни правеа свадба, но сега имаме милијардер кој е симпатичен кон Трамп, па го гледаат како помалку симпатичен".
Сепак, не сите мислат така. Матео Секи, лидер на активистичката група „Venessia.com“, истакнува дека во Венеција сите се добредојдени, но дека има граница. „Она што нè мачи е што правиме сè само затоа што доаѓа некој богат човек. На крајот, Венеција секогаш се продава на оној што ќе понуди најмногу.
Слично мислење дели и групата „Венеција не е Дизниленд“, која ја основаа млади Венецијанци за да ја подигне свеста за проблемите на масовниот туризам. Нивните профили на социјалните мрежи беа преплавени со коментари за свадбата на Безос, а еден од духовитите предлози беше да се воведат посебни даноци за свадбите на богатите во Европа.
Еден од активистите од групата рече: „Чекаме повеќе детали пред официјално да коментираме. Но, ако бевме домаќини на папата Франциско минатата година, мислам дека можеме да издржиме ваква свадба“.
Симбол на луксуз или туристичка замка?
Венеција со децении балансира помеѓу зачувување на својата автентичност и привлекување богати туристи. Дали венчавката на Џеф Безос ќе донесе економски бум или само уште еден хаотичен спектакл, останува да видиме. Додека некои гледаат можност за профит, други стравуваат дека градот сè повеќе ја губи душата - и станува место каде што може да се купи сè, па дури и малку приватност на неговите познати канали.
