Интервјуа // Интервјуа
ИНТЕРВЈУ ЕЛЕНА ПЕТРЕСКА: Софиа ќе биде балерина, а Михаел информатичар
Петереска Толевска: Ни се оствари желбата да имаме и син и ќерка[/caption]
Женски Магазин - Минатата година вторпат станавте мајка, Ви се исполни желбата по синот Михаел да родите и девојче. Какви интереси покажуваат Вашите деца?
Елена - Мајчинството е најубавата работа која ми се случила. Децата се неизмерна љубов, позитивна енергија и радост. Ми се оствари желбата да имам и син и ќерка. На лик се многу слични, дури на моменти како близнаци, а во карактерот се многу различни. Многу се мали да зборувам за нивните интереси, но ако уште отсега се гледа, Софиа ќе биде балерина, а Михаел ИТ менаџер. Тоа се моите прогнози (се смее). Важно е да се живи и здрави. Што и да работат во животот да биде од љубов, да бидат задоволни и духовно и материјално.
Женски Магазин - Сè повеќе естрадни уметници неизвесноста која ја носи комерцијалната сцена ја заменија со сигурно работно место. Колку време сте хорист во МОБ и кои се Вашите амбиции кон класичната музика?
Елена- Во Македонската опера и балет сум веќе десет години. Точно е дека многу уметници заради несигурниот статус и климавата атмосфера одбираат и сигурна основа. За среќа, мојата примарна работа е уметничка, па не ми претставува напор. Напротив. Како пејач на класична музика амбициите одамна ми се намалија. Иако како мецосопран имав доста понуди и можности да студирам и да пеам надвор од државата, сепак нешто ме одвлече од таа насока, очигледно не требало да биде.
[caption id="attachment_5286" align="aligncenter" width="636"]
Софиа на 2 септември го прослави првиот роденден[/caption]
Женски Магазин - Во една прилика изјавивте дека на ноќните настапи имате поголема слобода во музицирањето, импровизирањето и репертоарот. Како успевате да ги усогласите семејните обврски со ангажманите кои подразбираат нарушен биоритам?
Елена- Свирките ми се канализирање на енергија, се чувствувам опуштена, слободна и своја. После второто породување договорив повеќе настапи однапред и не бев свесна дека во овој период со две мали деца не е воопшто лесно да ја усогласам работата со домашните обврски. Затоа, сега сум повеќе дома и уживам во секој момент поминат со нив. Тековните интервјуа и фотосесии ги закажувам во текот на денот додека Михаел е во градинка, а Софиа со дадилката.
Женски Магазин - Сте се соочиле ли со некоја непријатна ситуација на Вашите свирки?
Елена- Нашата работа е поврзана со чести патувања, среќаваме луѓе со различни карактери, па освен убави имало и непријатни моменти. Со текот на времето и искуството ја научив психологијата на луѓето и вешто избегнувам тензични ситуации.
[caption id="attachment_5287" align="aligncenter" width="634"]
Михаел оди во градинка, во јануари ќе наполни три години[/caption]
Женски Магазин - Најавивте нов проект со „Импакт продукција“. За каков рефрен станува збор?
Елена- Снимив дует со мојот драг колега и пријател Дарко Јовановски кој ме покани да гостувам на неговиот деби-албум. Тој е во тимот на „Импакт Продукција“, прекрасни талентирани музичари со кои ќе соработувам и во иднина. Во проектот партиципираат уметници од Велес, Прилеп, Тетово и од Мичиген. Навистина сме уникатна екипа.
Женски Магазин На годинашниот „Макфест“ се натпреварувавте со песна на шведско дуо кое дебитираше на штипскиот фестивал, а стиховите за темата „Нешто“ се дело на Вашата колешка Елена Ристеска. Како се случи оваа интересна соработка?
Елена- Близначките Илва и Линда Персон песната ми ја понудија по препорака на Даниел Стојадиновиќ, мој пријател од Виена кој е менаџер на повеќе пејачки со интернационална кариера. Соработката со Елена се случи спонтано. Ме слушнала на еден од моите настапи како изведувам тема од мојата омилена пејачка Алиша Кис, многу ѝ се допаднало, па добила инспирација и идеја да ми направи песна. Морам да ја пофалам, има огромен талент за продуцирање и пријатно сум изненадена од посветеноста и од професионалноста.
За Женски Магазин, Ѓорге Стојанов
