ИНТЕРВЈУ РЕНАТА ПОПОВСКА: Прекрасно е да се биде заробен во креативноста

Таа е педагог во ОУ Лазо Трповски во Скопје. Својата кариера ја почна како новинар во МТВ. Уметничката нишка која ја носи во себе, ја разбуди едно лето. Од тој миг започна да создава магија. Работи со природни материјали како камења, коноп, дрво, а нејзините дела вешто ги прераскажуваат нејзините емоции.  Неодамна ја претстави својата прва изложба, каде присутните беа импресионирани од нејзините дела кои зрачат со безвременска енергија. Рената Поповска за Женски Магазин, ни раскажува за љубовта со која твори. Женски магазин: Кога ја откривте поврзаноста со уметноста? Рената Уметноста ми е во гените, вгнездена е во некое ќоше во мојот темперамент и во различни варијанти на креативен израз цел живот се дружиме. Потекнувам од уметничко семејство, растев во ателјето на мојата баба, академски сликар и со нејзините приказни за, природните убавини, жетварките, пејзажите, портретите кои ги сликаше и претвораше во уметнички ремек дела. Потоа, за време на моето 15 годишно работење како новинар во МТВ, каде што долг период работев во Редакцијата за култура создадов многу авторски емисии и го разоткривав тој прекрасен, возбудлив и раскошен уметнички свет на кој секогаш се восхитував и со цело срце и душа се вдомувам како дел од него. Патувањето во тој магичен свет на сликарите, скулпторите, фотографите, филмските, драмските уметници и претставувањето на нивното творештво длабоко и јасно ја дефинираа мојата перцепцијата кон уметноста. Женски магазин: Што беше пресудно да ја пренасочите сета своја љубов кон ова убаво и интересно ваше хоби?

Рената Едно убаво лето, куќа покрај море, многу палми, маслинови дрвја, каменчиња во најразлични бои и форми, суви гранки фрлени на куп за горење, складирани обични штици и даскичиња, исечени трупчиња од бука и даб, расфрлани кори од дрвата…и една гаража во куќата преполна со еден куп пили, штрафилици, шмиргли, чекани, клинци, силикони, лакови, коноп…и...ми се ококорија очите, ми се отвори една нова димензија, една поинаква енергија. Сите мој блиски на плажа, а јас таму кај гаражата… Е тоа лето не облеков пливачки костим, тоа беше моментот кога ме зароби некоја креативна енергија и целата природа околу мене почнав да ја доживувам како уметничко дело. Корките од дрвата почнаа да ми наликуваат на човечки ликови, на разни предмети, на куќички, на бротчиња, вазни, на се и сешто. Дрвените трупчиња на гитара, ќуп, девојка…камчињата на стапалчиња, ливчињата од маслинката, шишарките, гранките на милион форми и приказни. 

Тогаш ги создадов и првите мои изработки, си импровизирав една мала работилница покрај морето, се залепив со силикони и  лакови, ги изделкав и испосеков рацете, стругав, ковав, делкав, плетев коноп, не можев да престанам. Најубавиот момент беше што моите пријатели, првите кој ги видоа изработките беа одушевени, освен сопственикот на алатите, зошто ништо не можеше да си најде на место. Потоа почнав да шетам по целиот регион, собирав гранки, камења во различни големини, форми и бои, сите делови од палмите ми беа интересни, еден куп суви листови, морски ежиња. Си ги донесов во Скопје, со малку расправање дека немаше место за куферите, ама се си искористив после. Така почна мојата приказна Handmade by Renata,, која трае веќе четири години и резултираше со повеќе од 300 изработки од кои половина веќе си имаат свое место во многу домови и носат среќа, зошто секогаш така ги посветувам.

Женски магазин: Како вие ја сфаќате, како би ја дефинирале уметноста од ваш агол? Рената Многу проста дефиниција си имам јас: На пример математиката (за што не ме бидува многу) може да ме однесе само од точка А до точка Б, а уметноста секаде кај што ќе посакам, нема точки, нема правила и ограничувања, бесконечна слобода. Женски магазин: Вашите дела се навистина прекрасни. Работите исклучиво со природни материјали. Зошто?

Рената Природата за мене е најексклузивниот дуќан за купување материјали за работа, непресушен извор на уметничка инспирација и сама по себе најфасцинантен уметник. Природните материјали ми се достапни насекаде, на планина, на село, покрај река, море, езеро, па и на ливадата пред зграда, во парк, секаде и во секое време од годината. Секоја моја прошетка во природа е вистинска авантура, се пентарам по дрва, влечам огромни корки, дебели гранки, камења, ме лазат инсекти, црвчиња, бубачиња и собирам, се товарам секој пат повеќе и повеќе, па со време научив да си носам и ранец. Е сега малку чудно ме гледаат дома кога ќе се истоварам во дневна, ама се навикнаа.

Всушност, идејата ми е на даровите од природата да им дадам нов живот, да им вдахнам душа и да живеат како уметничка творба, како автентична рачна изработка, како дел од мене. Сакам се да биде природно, подлогата, материјалите кои ги користам во креирањето (камен, дрво, глина, коноп), па дури и рамките ги правам од гранки од палма или корки од дрво.

Женски магазин: Се сеќавате ли на своето прво дело? Што беше тоа? Какви беа импресиите на вашите блиски? Рената Првата моја изработка беа камените стапалчиња кои ми симболизираа семејство и едно бувче како симбол на среќа и мудрост, а направив и една гитара од дабово дрво, и неколку африкански девојки…Импресиите беа одлични, сите тие први изработки ги подарив на пријателите во куќата каде што се заразив,, со моево хоби. Позитивните реакции ми беа мотив да се фрлам во креативен занес, па продолжив да истражувам, да учам за својствата на дрвото, па дури и да си зборувам со камењата со корките, да се гледаме со часови очи во очи додека не почнат да ми наликуваат на нешто…и еве уште се занесувам“, креативно. Женски магазин: Која е симболиката на вашите творби? Кои се пораките кои сакате да ги пренесете преку нив?

Рената Моите изработки ја отсликуваат убавата страна на животот, камената безвременска енергија и вечната љубовна магија. Дрвото како симбол на животот и каменот како симбол на вечноста ги претворам во мој приказни за мудроста, љубовта, музиката, за традицијата, за човекот. Естетиката во моите творби се базира на природност, топлина и позитивна мисла.

Многу љубов и емоции истурам во овие творби, како да подарувам дел од себе, се осамувам и си уживам во мојата креативна планета…Има периоди кога работам македонски мотиви, носии, сегменти од типични македонски куќи, се обидувам и со иконите, со сликањето и резбата, цветови во различни варијанти, бувчињата ми се омилени, многу сакам да изработувам гитари, африкански жени, пак, тие ми се уметност сами по себе, мистериозни мажи, бакнежи, танцувачи… и сите си имаат своја приказна.

Женски магазин: Дали љубовта кон уметноста и творештвото, има некое фамилијарно ваше наследство или влијание или сепак вие сте прва во вашиот семеен круг? Рената Мојата баба, Катја Ефтимова е еден од доајените на македонското сликарство. Во ликовната историја е запишана како прва жена академски сликар во нашата земја која во 1945 година во Битола ја отворила првата самостојна изложба во Македонија воопшто. Горда сум што сум нејзина внука и што наследив врвни ликовни уметнички дела на кои секој ден им се восхитувам. Таа ни остави аманет делата да не се отуѓуваат, туку да се пренесуваат од генерација на генерација во нашето семејството. Нејзините дела секој ден ме потсетуваат дека уметноста и уметникот се вечни и безвременски. Всушност љубовта кон уметноста, почитувањето и доживувањето на уметничкото творештво како култура на живеење го наследив токму од неа и од моите родители. Женски магазин: Вашата вистинска професија е врзана со образованието. Како реагираат децата на вашите дела? Рената Цело училиште го накитив со моите изработки, мали ученичиња од камчиња, стапалчиња, рачно изработен часовник, сите скршени клупи и столчиња ги претворив во дела, многу училници насликав со весели бои да им го направам престојот во училиште попријатен и тие реагираат најискрено на свет, на пример: Браво бе педагог, ама си креативен! (строго во машки род) Женски магазин: Дали со нив заедно работите на одредени теми нешто слично на вашите творби?

Рената Работам како педагог во ООУ,, Лазо Трповски, арно ама покрај секојдневните обврски во рамките на моите професионални задачи, паметот ми е како да им го направам поинтересен денот на учениците, па измислувам еден куп воннаставни активности, и проекти, меѓу кои и Детската креативна работилница. Тука заедно твориме, лепиме, делкаме, боиме и на тој начин го поттикнувам нивниот креативен дух, свеста за естетика, а често работилницата ја користам и како метод за разговор, советување и педагошки насоки. Со нашите заеднички дела си го украсуваме училиштето.

Еднаш кога завршивме со една изработка еден ученик од 2 одд. ми вика: Па ова супер било, а нели за карање бевте вие? Најинтересно ми е кога ќе им каже некој наставник кога се недисциплинирани дали сака некој да го пратам кај педагогот? - Тие сите креваат рака!

Женски магазин: Во какви услови најчесто сакате да работите? Што ве мотивира најмногу? Рената Во секакви услови работам, дома, во двор, покрај море, на планина, во училиште со децата, на тераса, по столари, гаражи, шупи. Огромната кутија со алати ја влечам секаде со мене, природата ми е мотивот и изворот на материјали за работа. Многу често материјалите ги собирам и во отпад, по магацини, стоваришта…се може да си искористам. Е сега малку правам ѓубре и малку сум бучна…ковам, шмирглам… ама љубов е тоа, нема бегање. Дома ми викаат понежно и поженствено хоби не можеше да одбереш! Женски магазин: Првата изложба ја реализиравте неодамна. Какви се впечатоците по неа? Рената Одлично искуство, сметав дека тоа беше вистинскиот момент моите изработки да ги споделам со публиката. Мене ми беше преубаво, а што е најважно се уверив дека рачните изработки создаваат една посебна енергија и конекција со вистинскиот љубител на уметноста. Особено интерес покажаа странците кои се огромни почитувачи на handmade делата. Женски магазин: Дали веќе работите на план за нова изложба? Рената Продолжувам да работам, откривам нови предизвици, добивам нови идеи и создавам…а за втората изложба размислувам да ја поставам некаде во природа, мојата уметност во ритам со природата! До тогаш остануваме да се дружиме преку мојата ФБ страна,, Handmade by Renata,  https://www.facebook.com/groups/1166967206650691/about/ За Женски МагазинВики Чадиковска