Денес се слави големиот христијански празник - Светиот маченик Трифун
Македонската православна црква и верниците денес го слават големиот христијански празник - Светиот маченик Трифун.
Роден е во малоазиската област Фригија во Мала Азија, уште од рано детство во него се пројавила необична Божја благодат со покажување на дар на чудотворство. Тој на изненадување на своите современици имал моќ над болните. Посебно душевно заболените по погледот на младиот Трифун биле излекувани. Некоја необична исцелителна сила зрачела од неговиот поглед.
Меѓу многубројните негови чуда кои што ги вршел, се споменува и исцелувањето на ќерката на римскиот император Гордијан. Тој имал необично убава ќерка и поради нејзината убавина многу кнезови ја проселе за своите синови. Но се случило несреќа да оваа убава принцеза душевно се разболи. При страшните настапи на болеста таа многу пати сакала да се фрли во оган или вода. Ниеден лекар не можел да и помогне и да ја излечи. На девојката и е откриено дека единствено може да ја излечи „детето Трифун“. Злобниот дух од девојката тогаш проговорил велејќи дека него никој не може да го истера-освен Трифун.
После многу Трифуни од царството и овој Трифун го повикале во Рим да ја исцели царевата ќерка.
Царот го дарувал многукратно, а Трифун сите подароци им ги разделил на сиромашните.
Кога на власт дошол царок Дециј, Свети Трифун е мачен поради следбеништвото на Христос, а сите мачења ги поднел со голема радост.
Бидејќи ниедна мака не му нашкодила, мачителите му ја отсекле главата со меч.
Пред смртта Трифун му се помолил на Бога и умрел во 250 година.
Христијаните од ова место го зеле телото на маченикот и го пренеле во неговото родно место. Еден дел од светите мошти денес се наоѓаат во Москва во храмот посветен на Светиот маченик Трифун. Православната Црква го слави како исцелител, кој се удостоил на маченичкиот венец.
Неговиот ден се празнува на 14 февруари, тој свет ден е ден на лозарите и градинарите.
На овој ден лозарите приредуваат ручек и гозба и ги повикуваат и случајните минувачи , бидејќи се смета дека на домаќинот и целата куќа тоа ќе му донесе среќа. Инаку, се верува и дека од овој христијански празник започнува раната пролет.
Фото: denovi.mk
