Утринско кафе со Ирма Велковска: Постојано сум во тек со најновите модни трендови
Денот ми започнува со насмеаниот лик на Бен, мојот златен ретривер. Весел аларм кој не може да те изнервира, а и да го игнорираш (можам максимум два до три пати да му направам „snooze“). А веќе подолго време утринскиот ритуал ми започнува во „Drip“, место кое ми го смени мислењето и вкусот за вистинско кафе. Најдоброто еспресо и капучино ќе го најдете таму, а атмосферата е скроз автентична. Преку недела, првото кафе го пијам во придружба на Петар за појадок и пауза.
Освен што се будам со социјалните мрежи, со нив сум и постојано во текот на денот, професионално. Поголемиот дел од работата ми е менаџирањето на страните на брендовите на „Fashion Group“, па така постојано сум во тек со најновите модни трендови, ме исполнува тоа што ги знам и новитетите и парчињата уште пред да бидат достапни во продавниците. Текот на денот се одвива во постојана комуникација со вработени, соработници, медиуми, а после работа брзам да стигнам на вежбање или да се шетам со Бен.
Ме мотивира мојот партнер, сестра ми и нејзинатата „Lipa ceramics“, добар дизајн, вежбањето во „Тринити“, луѓе кои се откажале од конвенционалниот систем на работење и се осмелиле да изградат свој сопствен бренд/бизнис, џез музика, патувања, природата...
Вечерта најчесто ми завршува со вино и мезе, со партнерот, а и во друштво со различни пријатели и добра музика.
Филм, книга, серија, не бирам, го правам тоа што во моментот ми е најинтересно, но секогаш мора да имам по една-две тековни серии кои си ги пуштам, ако не ми испаднат плановите за излегување. До скоро бев опседната со „Stranger Things“, „all time favorite“ ми е „Mad Men“, а додека чекам да излезе новата сезона на „Game of Thrones“, се тешам со читање на последниот дел од истоимената серија.
Фото: Ани и Дими
( Ирма Велковска- маркетинг координатор во „Fashion Group“)