Утринско кафе со Јасмина Атанасоска: Кога секој би се трудел да ги направи работите најдобро што може би имале многу поквалитетен живот
Денот не може да ми започне без здрав појадок за потребната енергија, а потоа следуваат секојдневните обврски. Првото кафе обично го пијам на работа во друштво на мајка ми и сестра ми поради нашиот семеен бизнис.
Ме мотивираат успешни приказни и вредни луѓе. Кога секој би се трудел да ги направи работите најдобро што може би имале многу поквалитетен живот во сите области. Многу често мотивација црпам и од Инстаграм бидејќи гледам да следам профили на кои нема само да потрошам време, туку и ќе научам нови работи или некако ќе ме инспирираат.
Работам во туристичка агенција со што секој ден е различен. Деновите и обврските никогаш не се повторуваат и не можат да се предвидат, барањата на секој клиент се индивидуални, а јас уживам во реализирањето на нивните патувања. После работниот ден најдобро се опуштам со добар тренинг после кој се чувствувам исполнето.
Слободното време следува навечер, и најчесто го поминувам со најблиските и пријателите. Дружбите се во опуштена домашна атмосфера со многу смеа и чаша добро вино.
Поради краткото слободно време можам да изгледам филм, што и не е многу чест случај, а сериите дефинитивно не се моја омилена активност. Повеќе сакам да прочитам добра книга.
(*Јасмина Атанасоска - туристички агент во „Инфо Турс“- Прилеп)