Утринско кафе со Марија Василевска: Ме мотивираат видливите резултати од мојата работа

Добивај вести на Viber

Во текот на работната недела денот ми почнува со колегите во Центарот за социјални иновации Блинк 42-21. Заедно го пиеме утринското кафе/чај разговараме за случувањата од претходниот ден и правиме координација за активностите кои не очекуваат во текот на денот. Деновиве секојдневна тема на разговор ни е еден настан -HACKATHON for Immersive Storytelling for cultural heritage кој го организираме на 05 и 06 април во Скопје.

Во текот на викендот првото утринско кафе го пијам со семејството и пријателите на сонце, со пријатен и маратонски разговор .

Видливите резултати од мојата работа, конкретни промени кои ги правиме со дигиталните алатки кои ги развиваме , како пример со мЗаедница ме мотивираат. Убаво е чувството кога ќе видите дека алатките на кои сте работеле со тимот ги користат вашите пријатели, но не затоа што се ваши пријатели туку затоа што ја гледаат користа и вредноста на истите. Дополнително ме мотивираат долгите разговори со моите пријатели и семејството, низата на обуките кои тековно ги посетувам и докторските студии.

Моите дневни обрски се поврзани со проектите кои ги реализираме во Центарот за социјални иновации Блинк 42-21, соработката со различни партнери, планирање на идни проекти и секако следење на светските трендови за дигитализација и како истите можеме да ги прилагодиме за нашата земја. Тековно следам и неколку обуки по работното време како и предавањата за докторските студии на кои се запишав неоддамна, така што работниот ден ми трае секогаш повеќе од осум часа. Во листата на дневни планови ми се вклучени и преглед на дневните случувања на национално и интернационално ниво и ручек со семејството.

На крајот на денот сакам да направам план за што треба да се заврши наредниот ден, да прошетам и да сумирам што се случило во текот на денот. Денот го завршувам со Facebook разговор со другарките на релација Амстердам-Барселона- Скопје и со вежбање дома.

Обожавам да читам книги. Најсреќна сум кога на подарок ќе добијам книга, па и кога одбирам подарок првата опција е секогаш книга.  Иако имам долга листа на непрочитани книги поради работните обврски, но сепак читањето на книги секогаш ме мотивира и релаксира. 

(*Марија Василевска, Проектен Менаџер во Центарот за социјални иновации Блинк 42-21)