ВИДЕО: Што велат децата за децата на улица? Кои се најголемите проблеми со кои се соочуваат овие деца и како да се заштитат?
Алтернативен детски извештај на Првата детска амбасада Меѓаши
Во рамките на изработката на „Алтернативниот извештај за состојбата со правата на децата во Македонија – од перспектива на децата“ на Првата детска амбасада во светот Меѓаши, децата меѓу другото, ја истражуваа и темата „Деца на улица“.
Овој извештај е комплетно изработен од страна на деца од 12 до 17 години од повеќе градови низ Македонија, а истиот доаѓа како резултат на наодите од истражувањето за состојбата на правата на децата кое претходеше во периодот јуни-јули 2020 година, а во кое учествуваа повеќе од 1000 деца ширум земјата, но и врз основа на нивното лично искуство и искуството на своите врсници.
„Децата на улица“ е петтата тема која се обработува во извештајот, а децата на улица, се вели во извештајот, го поминуваат најголем дел од денот просејќи на улица, продавајќи ситни предмети или заработувајќи на друг начин. Тие се често малтретирани и понижувани, дискриминирани се и уценувани. На децата им се скратени основните човекови права. Тие немаат документи за идентитет, не одат во училиште, немаат слободно време и игра, не можат да се лекуваат кога се болни. Ниту нивните родители се во можност да им обезбедат соодветна грижа, ниту пак институциите и околината доволно се грижат! На овие деца треба да им се посвети повеќе внимание и грижа.
Кои се правата на децата за оваа значајна тема, со кои проблеми најчесто се соочуваат и кои се нивните препораки за подобрување на состојбите, погледнете во ова кратко, интересно видео.