КАДЕ ЌЕ СЛАВАТ ПОЗНАТИТЕ: Кој ќе ужива, а кој ќе работи за новогодишната ноќ?

Опуштено во домашна атмосфера, на заслужено романтично патување или на организиран дочек во некој од ноќните клубови. Вака познатите ќе слават за новогодишната ноќ. - Ќе одлучам во последен момент. Или дома со моето друштво или во еден познат скопски ресторан. Во секој случај, останувам овде. После празниците ќе прошетам некаде да ги наполнам батериите – ни откри популарната водителка Лила Стојановска. Актерката Јелена Јованова која повеќе од две години живее на релација Македонија-Хрватска вели дека не е човек што дава големо значење на оваа ноќ, но сепак ни ги откри плановите. - Горски Котар и Плитвичките езера се добитната комбинација за оваа Нова година – ни изјави таа. Нејзината колешка од ТВ-серијата „Преспав“, пејачката Тијана Дапчевиќ за претстојните празници ќе биде со семејството. - Новогодишната ноќ ќе ја поминам со синот и со сопругот кај моите во Скопје. Имав многу обврски изминатиов период и затоа сакам да се одморам барем за „најлудата“ ноќ. Во Македонија ќе останам и за Бадник и Божик – вели Дапчевиќ. Познатиот продуцент и автор Роберт Билбилов и оваа година ќе слави со најблиските, прво во еден од скопските ресторани, а подоцна во домашна атмосфера. - Во секој случај нема да биде работно, да не помисли некој дека некаде ќе пеам – се шегува Билбилов. Елена Велевска, пак, сопругот и децата ќе ги изненади со оригинален подарок. - Одлучив да не прифатам ниту еден ангажман и максимално да им се посветам на моите. Пред неколку дена со сопругот прославивме десетгодишнина од брак и по тој повод организирав патување низ Европа за целото семејство–открива популарната фолк-пејачка. Докажаниот македонски музичар и гитарист Владимир Крстевски-Франц со неговата сопруга, актерката Ема Џо Петреска ќе остане во Лос Анџелес и за празниците. - Новата 2018-та ќе ја дочекаме во еден од ексклузивните клубови во Западен Холивуд – ни откри познатата двојка. На илјадници километри од дома ќе слави и поп-пејачот Игор Митровиќ кој се пресели во Танзанија. - Новата година ќе ја дочекам на плажа, во градот каде што живеам, Дар ес Салам. Најавена е маратонска забава со популарни американски диџеи. Ќе славам со моите најблиски, со сестра ми и останатите Македонци што се тука, а веројатно ќе ни се придружат и блиски пријатели дојдени од различни страни на светот – ни изјави Митровиќ. Со најблиските ќе прослави и Елена Ристеска. Со нејзиното друштво во последен момент ќе одлучат дали ќе отпатуваат некаде подалеку или ќе останат дома. Во кругот на семејството ќе биде и Каролина Гочева. Македонки пејачи и актери на градските плоштади Дел од пејачите, музичарите и актерите сепак успеаја да договорат новогодишна „тезга“. Даниел Кајмаковски е најавен како ѕвезда на вечерта на организираниот дочек на градскиот плоштад во Охрид. Подиумот претходно е резервиран за неговата колешка Анита Мицова. Под отворено небо ќе слават и битолчани на плоштадот „Магнолија“. Ќе настапат поп-пејачот Бојан Стојков и групата „Боеми“. Свое шоу ќе имаат и актерите од Битолскиот театар Илина Чореска, Викторија Степановска-Јанкуловска, Марјан Ѓоргиевски и Маја Андоновска Илиејевски. Во останатите македонски градови, меѓу ретките организирани прослави на плоштад ќе биде и оној во Кавадарци. Општината најави скромно шоу со локални музичари. Програмата ќе ја води актерот Диме Коцевски, а во музичкиот дел ќе настапат Александра Михова и бендовите „Трилоџи“, „Лексикон“ и „Бадасал“. Во метрополата масовно ќе се слави само во Центар. На импровизирана бина на „Сквер Јадран“ ќе настапат Тамара Тодевска, Кристина Арнаудова, дуото „Некст тајм“ и групата „Ај Кју“. На другата страна на Вардар, уште неколку нивни колеги 2018 година ќе ја дочекаат работно. Македонскиот народен театар ја продолжува традицијата со новогодишни шоуа, а овојпат настанот е насловен „МНТ Супернова 2018, соѕвездие на добрата забава!“. На иста сцена ќе се претстават актерот Сашко Коцев, Бени Шаќири и „Нонстоп“, Биба Додева со својот бенд, Александар Митевски, „Дамир Имери бенд“ и Драган Б. Костиќ. За Женски Магазин, Ѓорге Стојанов