Досега го читавме, наскоро „Зоки Поки“ и ќе го гледаме во ТВ-серија
„Зоки Поки“ - се будевме и заспивавме со неговите детски лудории а сега имаме одлична вест за вас.
По култната книга која речиси да нема кој не ја знае и обожава ќе се снима играна серија.
Со 19 милиони денари режисерот Александар Поповски од Агенцијата за филм ќе ја снима ТВ-серијата „Зоки Поки“, во продукција на „Кино око“.
Зоки Поки - е книга за деца од македонската писателка Оливера Николова.
Првобитно, книгата беше објавена во 1963 година од страна на „Детска радост“, а потоа следувале голем број изданија. Во текот на долг период, книгата беше задолжителна лектира за учениците од основните училишта во Македонија а е преведена на српски, романски, украински, чешки, италијански, словенечки, турски, албански и германски јазик.
Да се потсетиме ...
Во едната рака Зоки стега два денари, а со другата ја држи Лидија. - Што сакаш да ти купам, Лиде. Имам многу пари, вели тој. Сè би направил за својата пријателка. - Сакам панделка, вели Лидија, и црвена, и бела, и жолта, и зелена, и сина, и... - Нема таква панделка, вели Зоки. - Има. - Нема. Јас знам повеќе од тебе. - Ти ништо не знаеш, вели Лидија, а и не сакаш да ми купиш. - Посакај друго, вели Зоки, веднаш ќе ти купам! - Сакам гума. И црвена и жолта и бела и зелена. - Ех,ех, нема ни таква гума. - Има. - Нема. Посакај друго! - Сакам јајце зелено, и црвено... - Пак и зелено и црвено и сино? Нема! Друго, друго! Лидија веќе се лути, но пак вели: - Сакам зелено, сино, бело, жолто... Тоа сакам. - Тоа не може да се купи, вели Зоки. Што сакаш ти поправо? - Сакам сè, вели Лидија. Сè, сè зелено, сино, бело, жолто... И веќе сака да плаче. - Како сè, сè? Сè што лета, сè што оди, сè што има? Сиот свет? - Да, вели Лидија, сиот свет зелен, црвен, жолт, син... Зоки најпосле се досетува. Одат во еден колонијален дуќан. Зоки ги подава двата денари и вели: - Чичко, сакам да го купам сиот свет. За Лидија. - Како? – прашува продавачот. - Сиот свет жолт, син, зелен, црвен... вели Лидија. - Ќе плаче ако не ѝ купам, објаснува Зоки. - Добро, вели продавачот и им завиткува нешто во една хартија. Еве! Децата излегуваат надвор. Во хартијата има две шарени бонбони. Лидија ни најмалку не е изненадена. Веднаш го грабнува едното бонбонче и го става в уста. Другото го зема Зоки. Децата сега шлапкаат со устите, лижејќи ги бонбончињата. Најпосле Лидија вели: -Леле, Зоки, ама е сладок сиот свет! Да го изгризам ли?
