Драма со Ивана Кнез на тајна вечера: Дизаjнерката со одлична ревија го отвори Скопски моден фестивал
Македонската дизајнерка Ивана Kнез ги прослави петнаесетте години присуство на домашната сцена со драматичниот спектакл „Viva La Drama“, кој се одржа синоќа во трговскиот центар Diamond Mall.
Mистеријата е конечно разрешена – домаќинка на тајната вечера за која се подготвуваа главните протагонисти од најавнaта кампања за четвртата сезона на Skopje Fashion Festival powered by Државна лотарија – всушност е Ивана Кнез, која на присутните гости под маски им ја сервираше цела своја кариера, преточена во креации инспирирани од петте филмови кои оставиле најсилен впечаток во креативната дејност на дизајнерката.
„Инспирирана сум од пет култни филмови кои влијаеа во создавањето на тоа што сум, култни филмови кои до ден денес менуваат животи. Ја посветувам на моите најмили, на оние кои ме поддржаа, без разлика на се што се случи изминативе петнаесет години. Наменета е за жени кои не се плашат да живеат, кои не се вклопуваат во туѓи критериуми за среќа и кои имаат храброст да бидат свои.“ - истакна Ивана Кнез.
А за Женски магазин додаде дека всушност ревијата ја посветува на нејзината мајка која ѝ е поддршка во се!
На модната ревија со драмски призвук, дизајнерката ја претстави новата колекција, која е стилски омаж на филмовите: The Pink Panther (1963), Scarface (1983), Pulp Fiction (1994), The Fifth Element (1997) и Gladiator (2000), низ сценска игра на моделите, кои слободно комуницираа со публиката, претворајќи ја и неа во активен учесник во претставата. Шоуто кулминираше со изведбата на „Lady Marmalade“ oд музичката ѕвезда Бојана Скендеровски, додека манекенките дефилираа во црвени корсети, буква по буква, за френетичен завршеток на спектаклот „Viva La Drama“.
Свеченото отварање на четврта сезона на Скопски моден фестивал, кој втора година по ред се одржува во партнерство со Државна лотарија, продолжи со уметничкиот перформанс на артистот Бојан Ковски, во соработка со луксузниот бренд за накит Ador. Ана Ежова се појави во улогата на Венера, но во позлатена верзија, како од вештите раце и цртежот на тело од Ковски, така и со златните ланци и прстени од Аdor. Првата фестивалска вечер на Skopje Fashion Festival заврши со забава во ресторанот Мilo, каде до доцните часови се споделуваа импресиите од „Viva La Drama“.
