НЛБ Галерија: Промоција на „Концепт мама” - првата македонска сѐ-во-едно книга и дневник за родителството
Во НЛБ Галерија на 2 Октомври, 2018 година (вторник) со почеток во 19 часот ќе бидат промовирани книгите „Концепт мама” и „Концепт мама дневник” од Александра Шекутковска Докоска.
„Концепт мама” е првата македонска сѐ-во-едно книга и дневник за родителството. Александра Шекутковска Докоска користи комбиниран жанр од дневник и прирачник, обединувајќи го личното искуство со стручни сознанија и практични совети.
Низ своите размислувања и истражувања таа опфаќа сѐ што би им било неопходно на современите родители. Изборот на теми е според најсовремените препораки и трендови и претставува моќна алатка за самоподдршка, конструирање на целовит и балансиран пристап и градење самодоверба во себе како родител.
Александра Шекутковска Докоска (1984) е родена во Скопје, Македонија. Дипломирала како архитект-инженер на Архитектонскиот факултет во Скопје 2009 година. Во септември 2012 завршила напредни магистерски студии за урбан дизајн на ЕТХ Цирих. Работела како архитект, урбан дизајнер, истражувач и асистент на универзитети и студија во Скопје, Цирих, Бангкок и Франкфурт.
