Секој викенд деца без родители ручаа во нашиот дом: Амернис Нокшиќи си ја отвори душата
За мене е нормална грижата за оние кои ја немаат таа среќа да имаат дом, ни изјави познатата актерка
Посвојувањето е благородна мисија, порача во една прилика Амернис Нокшиќи која минатата година активно се вклучи во кампањата „На секое дете му треба семејство“ која ја стартуваше Министерството за труд и социјална политика во соработка со УНИЦЕФ.
- Сметам дека оваа кампања е многу благородна, многу позитивна. Очекувам луѓето малку да се освестат и да сфатат дека сите имаме љубов за давање. Сметам дека луѓето кои посвојуваат деца ги збогатуваат своите животи, а со тоа внесуваат среќа, радост и сигурност во животот на невиното дете - изјави Нокшиќи во екот на кампањата.
Таа за „Женски Магазин“ појасни дека посвојувањето е исклучителна одговорност, како што вели, можеби поголема од онаа да се има свое дете.
- Одлуката за посвојување е интимна и мора да биде донесена со голема и неотповиклива согласност на лицето или лицата кои се одлучуваат на тој чекор - ни изјави таа.
Амернис ни откри дека е растена и воспитувана во духот на вистинските вредности.
- Кога бев мала живеевме во бараката карши Албанскиот театар. Заедно со мајка ми, секоја недела одевме во Домот за деца без родители „11 Октомври“ и се враќавме со едно од тие деца кои потоа остануваа кај нас на ручек и викенд. Оттука, за мене е нормална грижата за оние кои ја немаат таа среќа да имаат дом - ни раскажа Нокшиќи.
